११ असार, एजेन्सी। जापानमा एक जना कर्मचारीले युएसबी फ्ल्यास ड्राइभ (पेन ड्राइभ) हराउँदा सरकारी अधिकारीहरू तनावमा परेका छन्। अफिसबाट घर फर्किने बेलामा रक्सी खाएर अचेत भएपछि एक कर्मचारीले पेनड्राइभ हराए ।
ती कर्मचारीको नाम भने गोप्य राखिएको छ।
जापानको आमागासाकी सहरका सबै नागरिकहरूको विवरण पेनड्राइभमा राखेर ती व्यक्ति घर फर्किँदै थिए। तर, साँझको बेला भएका कारण उनी रेष्टुरेन्टमा गएर मदिरा पिउन थाले। धेरै मदिरा पिएपछि उनी अचेत भएपछि बिहान बाटोमै सुतिरहेका थिए।
तर, उनले साथमै बोकेर ल्याएको पेनड्राइभ भने हराएको थियो। आमागासाकी सहरका सबै मानिसको विवरण भएको पेनड्राइभ हराएपछि त्यहाँ तनाव उत्पन्न भएको छ। उत्क पेनड्राइभमा ४ लाख ६० हजारभन्दा बढीको व्यक्तिगत विवरण रहेको बताइएको छ।
‘हामीले नगर प्रशासनमा जनताको विश्वासलाई गहिरो चोट पुर्याएकोमा हामी गहिरो खेद व्यक्त गर्दछौं।’ सरकारी अधिकारीले पत्रकार सम्मेलनमा भनेका छन्।
ओसाका नजिकैको कल सेन्टरमा दिनका लागि पेनड्राइभमा आमागासाकीका नागरिकहरूको विवरण कपी गरेको बताइएको छ।
उक्त विवरणमाशहरका सबै बासिन्दाहरूको नाम, लिङ्ग, ठेगाना, जन्मदिन र अन्य व्यक्तिगत जानकारी, साथै कर डाटा र केही स्थानीयहरूको बैंक खाता जानकारी समेत समावेश गरिएको छ।
पेनड्राइभ हराएता पनि यसमा भएका डाटाहरू पासवर्डले सुरक्षित गरिएका कारण डाटाहरूको गलत प्रयोग हुन नसक्ने सरकारी अधिकारीले अनुमान गरेका छन्।
यस घटनाबारे प्रहरीलाई जानकारी गराइएको र अनुसन्धान समेत सुरू भएको सरकारी अधिकारीहरूले बताएका छन्।
