काठमाडौँ। एप्पलको वल्र्डवाइड डेभलपर्स कन्फेरेन्स (डब्लुडब्लुडीसी) २०२५ कार्यक्रम भोलि, ९ जूनबाट सुरु हुँदैछ। पाँच दिनसम्म चल्ने यस सम्मेलनमा कम्पनीले आफ्ना प्रमुख सफ्टवेयर र सम्भावित नयाँ हार्डवेयरको घोषणा गर्ने अपेक्षा गरिएको छ।
पाँच दिनसम्म चल्ने यो भर्चुअल सम्मेलनमार्फत एप्पलले आफ्नो सफ्टवेयर र सम्भावित हार्डवेयर सम्बन्धी विभिन्न महत्त्वपूर्ण अपडेटहरू घोषणा गर्ने अपेक्षा गरिएको छ। आईफोन, म्याक, आइप्याड, एप्पल वाच, एप्पल टिभी जस्ता उपकरणका लागि नयाँ अपरेटिङ सिस्टमको साथसाथै कम्पनीले एआई प्रविधिमा समेत ठूला कदम चाल्न सक्ने संकेत देखिएको छ।
कार्यक्रम कहिले र कहाँ हेर्ने?
कार्यक्रम नेपाली समय अनुसार राति १०:४५ बजे सुरु हुनेछ। ‘प्ल्याटफर्म स्टेट अफ द युनियन’ भने बिहान १:४५ बजे हुनेछ। इभेन्ट एप्पलको वेबसाइट, युट्युब च्यानल र एप्पल टिभी एपमा लाइभ हेर्न सकिनेछ।
मुख्य सम्भावित घोषणा:
आईओएस २६: यसपटक आईओएसको नाम नयाँ शैलीमा प्रस्तुत हुने सम्भावना छ, जसले वर्षसँग मिल्दो बनाउनेछ।
नयाँ डिजाइन: सबै एप्पल उपकरणहरूमा नयाँ आइकन र इन्टरफेस सहितको अपरेटिङ सिस्टम।
नयाँ गेमिङ एप: पुरानो गेम सेन्टर हटाई नयाँ पूर्व–इन्स्टल गरिएको गेमिङ् एप ल्याइने सम्भावना।
एआई इन्टिग्रेशन: तेस्रो–पक्ष एपहरूमा एप्पलको एआई प्रयोग गर्न नयाँ टूलकिट प्रदान गरिने।
नयाँ म्याक प्रो र आइफोन १७ एयर: सम्भावित रूपमा अहिलेसम्मकै पातलो आइफोनका रूपमा आइफोन १७ एयरको झलक देख्न पाइने।
