६ मंसिर, एजेन्सी। ट्वीटर, मेटा र अमेजन जस्ता प्राविधिक उद्योगहरूबाट कामदार बर्खास्त गर्न सुरू गरिएपछि भारतीय कर्मचारीहरूलाई ठूलो असर परेको छ। अमेरिकामा H-1B भिसामा बसिरहेका भारतीय नागरिकहरू समस्यामा परेक बिबिसीमा उल्लेख गरिएको छ।
सन् २००९ देखि अमेरिकामा काम गरिरहेकी सुर्भी गुप्ता मेटाले गरेको कर्मचारी कटाैतीमा परिन्। मेटाको यो निर्णयले उनी अचम्मित समेत भएको प्रतिक्रिया दिएकी छिन्।
फेसबुक, इन्स्टाग्राम र ह्वाट्सएपको मातृ कम्पनी मेटाले नोभेम्बर ९ मा १३ प्रतिशत कर्मचारी कटाैती गर्ने घोषणा गरेको थियो। कम्पनीको इतिहासमै पहिलो पटक गरिएको सबैभन्दा ठूलो बर्खास्तीबाट ११ हजार कर्मचारी प्रभावित भएका थिए।
‘त्यो रात हामी कोही पनि सुतेनाैँ।’ गुप्ताले भनिन्, ‘ बिहान छ बजे हामीले इमेल पायाैँ। त्यो मेलले मेरो सम्बन्ध बिच्छेद भएको जस्तै अनुभूति गरायो।’
गुप्ता भारतीयहरूको लागि परिचित अनुहार हुन्। २०१८मा मिस भारत-क्यालिफोर्निया प्रतियोगिताको विजेता, उनी भर्खरै नेटफ्लिक्स शो इन्डियन म्याचमेकिंगमा देखिएकी थिइन्।
अब उनी यस महिना अमेरिकी प्राविधिक कम्पनीहरूले निकालेका हजारौं शिक्षित र दक्ष आप्रवासी कामदारहरूमध्ये एक हुन्।
तीमध्ये धेरैले HI-B भिसा लिएर अमेरिकामा काम गरिरहेका छन्। यो गैर-आप्रवासी भिसा हो जसले फर्महरूलाई विदेशीहरूलाई छ वर्षसम्म काम गर्न अनुमति दिन्छ। अमेरिकी दक्ष कर्मचारी फेला नपरेसम्म अमेरिकी कम्पनीहरूले यो भिसामार्फत दक्ष कामदार काममा लगाउन सक्छन्।
यो भिसा होल्डहरूले अमेरिकामा स्थायी बसोबासको लागि आवेदन दिन र देशमा सम्पत्ति खरिद गर्न समेत पाउँछन्।
टेक कम्पनीहरूले कर्मचारी कटाैती गरेको ट्र्याक गर्ने Layoffs.fyi वेबसाइटका अनुसार विश्वभर १ लाख २० हजारभन्दा बढी प्राविधिक क्षेत्रमा काम गर्ने व्यक्तिहरूले अमेरिकी टेक कम्पनीहरूले कटौतीको परिणाम स्वरूप जागिर गुमाएका छन्।
सान जोस-आधारित अध्यागमन अधिवक्ता स्वाती खण्डेलवाले यसले विशेष गरी भारतीय समुदायलाई चोट पुर्याएको बताएकी छन्।
