खाद्य प्रविधि तथा गुण नियन्त्रण विभागले प्रयोगशाला सेवामा अनलाइन प्रणाली सुरुवात गरेको छ ।
विभागस्थित राष्ट्रिय खाद्य तथा दाना रिफरेन्स प्रयोगशालाको सेवा प्रवाह छिटो छरितो एवं प्रभावकारी बनाउन ल्याबरोटरी ईन्फर्मेसन म्यानेजमेन्ट सिष्टम (लिम्स) प्रणाली मार्फत सेवा दिने भएको हो ।
कृषि तथा पशुपन्छी विकास मन्त्री डा. बेदुराम भुसालले बिहीबार अनलाइन प्रणालीको शुभारम्भ गर्दै सेवा प्रवाह तथा सेवाग्राहीको सेवा प्राप्तिको लागि अनलाइन प्रणाली महत्त्वपूर्ण उपलब्धीको रूपमा रहेको बताए । सेवाग्राहीले सहज रूपमा आवश्यक सबै प्रयोगशाला सेवा पाउने गरी आगामी दिनमा अपग्रेड गर्दै जानु पर्ने मन्त्री भुसालको भनाई छ ।
यसैगरी हाल लागू गरिएको अनलाइन लिम्स प्रणाली आगामी दिनमा विभाग तथा मातहतका कार्यालयमा समेत क्रमशः लागू गर्दै सेवाग्राहीलाई सहज हुने गरी व्यवस्थापन गर्ने विभागको सोच रहेको विभागकी महानिर्देशक डा. मतिना जोशी वैद्यले बताइन् ।
यसअघि सेवाग्राहीले प्रयोगशाला सेवाका लागि विभागमै गएर नमुना परीक्षणका लागि नमुनासहित निवेदन दिनु पर्थ्यो भने परीक्षण प्रतिवेदन तयार भएको÷नभएको तथा नमुना परीक्षणको चरणबारे बुझ्न सम्बन्धित विश्लेषकबाट जानकारी लिनु पर्ने अवस्था थियो ।
यसैगरी विभागमा पनि नमुनाको कोडिङ/डिकोडिङ्ग, विश्लेषण जिम्मेवारी, भेरिफिकेसन, डकुमेण्टेसन, रिपोर्ट तयारी लगायत कागजी प्रक्रियामा मात्र सीमित रहेको थियो ।
अनलाइन लिम्स प्रणाली लागू गरेसँगै सेवाग्राहीले उक्त प्रणालीमा आबद्ध भई आफूले लिन चाहेको प्रयोगशाला सेवा, लाग्ने राजश्व दस्तुर, नमुनाको परीक्षण सम्पन्न भएको अवस्थाहरूबारे घर तथा आफ्नै कार्यालयबाट जानकारी लिन सक्ने छन् ।
विभागका अनुसार अनलाइन प्रणालीमा आबद्ध हुन आफ्नो व्यवसायसँग सम्बन्धित विवरण तथा कागजातहरू प्रणालीमा अपलोड गर्नु पर्नेछ । यसैगरी प्रयोगशालामा समेत नमुना दर्ता, कोडिङ÷डिकोडिङ्ग, विश्लेषक जिम्मेवारी, भेरिफिकेसन, डकुमेण्टेसन, रिपोर्ट तयारी, नमुना परीक्षणको चरण हेर्ने जस्ता कार्यहरू अनलाइन प्रणालीबाट नै गर्न सकिने विभागले जनाएको छ ।
सेवाग्राहीले एक पटक प्रणालीमा आबद्ध भई आफ्नो नमुना परीक्षण सम्पन्न भएको जानकारी सोही प्रणालीमा हेरेपछि विभागमा गई प्रतिवेदन लिन सक्नेछन् । यसका साथै प्रणालीमा रहेको लिएको वा लिन चाहेको सेवासँग सम्बन्धित आफ्ना विवरणहरू सजिलैसँग हेर्न सकिने विभागले जनाएको छ ।
यसले सेवाग्राहीलाई अनावश्यक झन्झट हट्न गई सेवा प्राप्तिमा सहज हुनुका साथै प्रयोगशालामा पनि नमुना परीक्षणको चरणबारे जानकारी रहँदा सेवा छिटो, छरितो, प्रभावकारी हुनुका साथै रेकर्ड सिष्टम समेत व्यवस्थित हुने विभागको भनाई छ ।
