२५ वैशाख, नेपालगञ्ज । नेपालगञ्ज उपमहानगरपालिकाले ई–रिक्साहरूको चुस्त व्यवस्थापनका लागि ‘सचेतीकरण अभियान’ थालेको छ । नगरमा जथाभावी ई–रिक्सा चलाउँदा नियमन र अनुगमनसँगै अभिलेखीकरणमा पनि समस्या भएपछि आजदेखि जेठ १० गतेसम्म उक्त पालिकाले सचेतीकरण अभियान सुरुआत गरेको हो ।
ई–रिक्सा सञ्चालनका लागि उपमहानगरपालिकाले दर्ता प्रक्रियामा ल्याउन यसअघि नै पटक–पटक ताकेता गरिसकेको छ । उपमहानगरपालिका दर्ता भएका ई–रिक्सा मात्रै नगरभित्र सञ्चालन गर्न दिने स्पष्ट नीतिका साथ अघि बढेको छ । गणेशमान चोकदेखि सुरु गरिएको अभियानमा नगरप्रमुख प्रशान्त विष्ट, उपप्रमुख कमरुद्दिन राई, ट्राफिक प्रहरी, नगर प्रहरी, ई–रिक्सा प्रालिका प्रतिनिधिलगायत सरोकारवालाहरूले सडकमा गुडिरहेका ई–रिक्साहरूको आधिकारिकता परीक्षणसँगै अवैधानिक तरिकाले नचलाउन सचेतसमेत गराएको नगर प्रहरी प्रमुख सूर्यबहादुर बोगटीले बताए ।
अन्य पालिकामा दर्ता भएका ई–रिक्सा पनि नेपालगञ्जमै जथाभावी रूपले चल्दा व्यवस्थापनमा चुनौती थपिनुका साथै दुर्घटनासमेत बढेको नगर प्रमुख विष्टले बताए । “चालकले अनिवार्यरूपमा चालक अनुमतिपत्र लिएको हुनुपर्दछ, फोटोसहितको अभिलेख हामीले राख्छौँ, नियमपूर्वक चलेका छन् कि छैनन् हेर्छौं, केही दिन सम्झाउँछौँ, बुझाउँछौँ”, नगर प्रमुख विष्टले भने, “त्यसपछि भने हामी निर्मम ढङ्गले प्रस्तुत हुन्छौँ, चुस्त दुरुस्त व्यवस्थापन गर्नेमा दृढताका साथ अघि बढ्छौँ ।”
उनले यो अभियानको समयावधिभित्र पनि दर्ता प्रक्रियामा नआउने ई–रिक्साहरूलाई प्रचलित कानूनबमोजिम कारबाही गरिने स्पष्ट पारे । ई–रिक्सा व्यवस्थापनलाई मुख्य प्राथमिकतामा राखेर काम गरिरहेको नगरप्रमुख विष्टको भनाइ छ । नेपालगञ्ज उपमहानगरपालिकाले रिक्साहरूलाई राजस्व शाखामा अनिवार्य दर्ता गराउन पटक पटक सूचनासमेत जारी गरिसकेको छ ।
राजस्व शाखामा दर्ता भएपछि चालक अनुमतिपत्र प्रदान गर्दै ई–रिक्सा चलाउँदा ध्यान दिनुपर्ने विषयमा आवश्यक तालिमसमेत दिने गरिएको छ । नगरमा १२–१३ हजार रिक्सा सञ्चालनमा रहेको अनुमान छ । यीमध्ये हालसम्म दुई हजार रिक्सा मात्रै राजस्व शाखामा दर्ता भएको शाखाप्रमुख वीरबहादुर थापाले जानकारी दिए ।
निजी प्रयोजनका लागि भनेर किनिएका रिक्सा सार्वजनिक साधनका रूपमा प्रयोग गर्नेको सङ्ख्या अत्यधिक रहेको छ । रातो नम्बर प्लेटलाई आफूखुसी कालो बनाएर चलाउनेहरूको सङ्ख्या पनि ठूलो देखिएको छ । उपप्रमुख राईले नेपालगञ्जले थेग्न नसक्ने गरी अनियन्त्रितरूपमा बढेका ई–रिक्साहरूको उचित व्यवस्थापन गर्न लागिपरेको बताए ।
“केही दिन सचेतनामूलक अभियान चलाउँछौँ, हाम्रो नीति र मापदण्डअनुसार चल्न सचेत बनाउँछौँ, दर्ता प्रक्रियापछि पार्किङ, रुट अनुमतिलगायतका विषयमा योजनाबद्ध हिसाबले अघि बढ्छौँ”, उपप्रमुख राईले भने ।
ई–रिक्सामा साइड सिसा राखेरनराखेको, एक साइडमा डन्डी हालेर नहालेको, रातो नम्बर प्लेटका रिक्साले यात्रु ओसारे–नओसारेको, रातोलाई आफूखुसी कालो बनाएर अवैध ढङ्गले चलाएरनचलाएको, हेडलाइटको अवस्थालगायत कुरालाई मसिनो गरी हेरेर नियमन र अनुगमनको पाटोलाई प्रभावकारी बनाइने नेपालगञ्ज उपमहानगरपालिकाले जनाएको छ ।
