क्रिप्टोकरेन्सी तथा नेटवर्किङ मार्केटिङ कारोबार नगर्न, नगराउन बैंकर्स संघले आग्रह गरेको थियो। नेपालभित्र बस्ने नेपाली र विदेशीले मात्र नभई विदेशमा बस्ने नेपालीले पनि त्यस्तो कारोबार गर्न नहुने स्पष्ट पारेको थियो तर नेपालमा प्रतिबन्धित डिजिटल मुद्रा क्रिप्टोकरेन्सीको कारोबारीले प्रयोग गर्ने ३० वटा विद्युतीय उपकरण बरामद भएको छ ।

क्रिप्टोकरेन्सीको पासवर्डलाई सुरक्षित राख्ने प्रायोजनमा समेत प्रयोग हुने उपकरण त्रिभुवन अन्तर्राष्ट्रिय विमानस्थल, काठमाडौंमा बरामद भएको हो । सो उपकरणको नाम ‘डिजिटल वालेट’ रहेको जानकारी आएको छ ।

त्रिभुवन अन्तर्राष्ट्रिय विमानस्थलमा हङकङबाट आएका ती सामग्रीप्रति शंका लागेपछि विमानस्थल भन्सार कार्यालयले परीक्षणका लागि प्रहरीको केन्द्रीय अनुसन्धान ब्यूरो (सीआईबी) मा पठाएको थियो । ब्यूरोका डीआईजी धिरजप्रताप सिंहका अनुसार, बरामद गरिएको सामग्री क्रिप्टोकरेन्सी कारोबार गर्नेले पनि प्रयोग गर्छन् भन्ने कुरा खुलासा भएको छ।

क्रिप्टोकरेन्सी कारोबार र यस्ता उपकरणलाई गैर कानुनी मानिने भएकाले गर्दा तेस्लाई नष्ट गर्ने प्रक्रिया सुरु गरेको  डीआईजी बताउनु भएको छ ।

प्रहरीका अनुसार बरामद गरिएको सामग्री कम्प्युटरमा भएका अन्य फाइल वा पासवर्डहरुलाई लुकाउन पनि प्रयोग गर्न सकिने जनाइएको छ । डीआईजीका अनुसार क्रिटोकरेन्सीको डिटेल लुकाउन पनि प्रयोग हुने गरेको यो सामग्री नेपालमा किन ल्याइएको थियो भन्ने कुरा अहिले सम्म स्पष्ट भइसकेको छैन ।

यो सामग्री बिदेशमा बस्ने व्यक्तिले अनलाइनमार्फत खरिद गरेर नेपाल पठाएको अधिकृतहरुले बताएका छन् । त्यस्ता उपकरण तथा व्यवसायमा संलग्न भई नेपालभित्र बसोबास गर्ने नेपाली तथा विदेशी नागरिक र विदेशमा बस्ने नेपाली नागरिकलाइ प्रचलित कानुन बमोजिम कारबाही हुने सूचना प्रकाशन गरिएको छ । तर बरामद गरिएका उपकरणहरु हालसम्म प्रयोग भएका छैनन् ।