पछिल्ला केही वर्षहरूमा, गुगलले प्रायः आफ्ना प्रयोगकर्ताहरूको स्मार्टफोनमा लोकेसन साझेदारी सुविधा बन्द गरेता पनि लोकेसन ट्र्याक गर्ने आरोप लगाइएको छ । लोकेसन अफ गर्दा पनि प्रयोगकर्तालाई ट्रयाक गरेको भन्दै गुगलमाथि मुद्दा दायर भएको हो।

वाशिंगटन महान्यायाधिवक्ता बब फर्ग्युसनले गुगलले उपभोक्ताहरूले आफ्नो खाता सेटिङहरूमा “लोकेसन हिस्ट्री” बन्द गरेपछि पनि आफ्ना प्रयोगकर्ताहरूको स्थानमा डेटा सङ्कलन गरेको भन्दै आरोप लगाएका हुन्।

गुगलले एन्ड्राेइड डिभाइसमा लोकेसन शेयर गर्ने/नगर्ने भन्ने कुरा प्रयोगकर्तामा निर्भर रहने बताउँदै आएको छ । तर लोकेसन शेयरिङ अफ गर्दा पनि गुगलले प्रयोगकर्तालाई ट्रयाक गर्ने र डेटा संकलन गरी कम्पनीले दुरूपयोग गर्ने गरेको आरोप लागको छ ।

कम्पनीले आफ्नो व्यापार बढाउन प्रयोगकर्ताको डेटा संकलन गर्ने गरेको र सोही डेटाका आधारमा प्रयोगकर्तालाई विज्ञापन देखाउने गरेको मुद्दामा उल्लेख गरिएको छ । तर गुगलले भने आफू प्रयोगकर्ताको गोपनीयता र सुरक्षाप्रति संवेदनशील भएको दाबी गर्दै आएको छ ।

साथै यस्ता गतिविधिलाई लुकाउन गुगलले ठूलो रकम खर्चिरहेको आरोप समेत लागेको छ ।

अक्टोबर २०२० मा, अमेरिकी न्याय विभागले ११ राज्यहरू मिलेर अनलाइन खोज र विज्ञापनमा आफ्नो प्रभुत्वको दुरुपयोग गरेको आरोपमा गुगल विरुद्ध ल्यान्डमार्क एन्टिट्रस्ट मुद्दा समेत दायर गरेका छन् ।