नेपालमा सार्वजनिक सवारी साधनको समस्या त छँदै छ , ट्याक्सी स्ट्यान्डमा आइपुग्दा ब्याक र प्यासेन्जर लुछाचुँडी गर्ने चालकहरुको हर्कत देखेर जो कोहि वाक्कै हुन्छ। नेपालमा कुनै व्यक्तिलाई आफ्नो परिवार तथा इस्टमित्रहरुसँग कतै घुम्न जान पर्यो र गाडी रिजर्भ गर्नुपर्र्यो भने अल्लमल्ल पर्छन् । कता जाने, कसलाई भन्ने दुविधा हुन्छ, र येस्तो अवस्था र झन्झटबाट मुक्त हुनका लागि सजिलो रेन्टल प्लेटफर्म विकास गरिएको हो ।

लामो समयको अध्ययन, अवलोकन तथा विमर्शपछि अर्जुनले आफ्ना भाइ प्रज्ज्वल फुयाँलसँग मिलेर ‘सजिलो रेन्टल’ नामको नयाँ भेन्चर स्थापना गरेका छन् ।  एक वर्षदेखि परियोजना सुरु गरे पनि प्रविधि तथा अन्य पाटोलाई व्यवस्थित गर्दै लैजाने क्रममा अहिले आएर एप सार्वजनिक गरेको संस्थापक अर्जुनले बताएका छन् ।

वास्तवमा सजिलो रेन्टल कार भाडामा लिने एउटा अनलाइन प्लेटफर्म हो । जहाँ कुनै पनि व्यक्तिले आफूलाई मन परेको गन्तव्यमा आफैंले रोजेर गाडी बुक गर्न सक्छन् भने गाडी भएको व्यक्ति वा संस्थाले पनि गाडी भाडामा लगाउन सिस्टममा आफ्नो गाडीलाई ‘अनबोर्ड’ गर्न सक्छन् । एप सार्वजनिक भएको एक महिनामै यसलाई एक सयभन्दा धेरैले इन्स्टल गरिसकेका छन् ।यसबाट कम्तीमा मान्छेहरुले ‘लगइन’ गरेर आफूलाई चाहिने उपयुक्त गाडी आफैंले भाडामा लिन सक्छन् ।

हेर्दा पठाओ वा टुटलजस्तो लागे पनि सजिलो रेन्टलको सेवा र व्यवसायको मोडल एकदमै फरक रहेको छ। ४ घण्टाभन्दा बढी, एक दिन वा महिनाभरि काठमाडौं उपत्यका वा नेपालभरि घुम्न जाँदा सजिलो रेन्टल एपबाट गाडी बुक गर्न सकिन्छ ।यसरी लामो समयका लागि गाडी भाडामा लिँदा सुरक्षाका कुराहरु पनि अति नै महत्वपूर्ण हुन्छन् ।

यात्रुहरुको सुरक्षा सरोकारलाई पनि सजिलो रेन्टलले राम्रोसँग सम्बोधन गरेको छ । वास्तवमा कुनै पनि सवारी चालकले सजिलो रेन्टलमा आफ्नो सेवा वा गाडी ‘अनबोर्ड’ गर्नुअघि सजिलो रेन्टलका कर्मचारीहरुले चालकको सम्पूर्ण कागजात, ट्राफिक हिस्ट्री, लाइसेन्सलाई प्रमाणीकरण गरेर मात्र अनुमोदन गर्दछन् ।

साथै कुनै यात्रुले सजिलो रेन्टलबाट गाडी बुक गरेर यात्रा गरेपछि यात्राको अनुभव, सुविधा र सहजताका बारेमा आफ्नो धारणा लेखेर, चालकलाई रेटिङ दिने साथै अन्य यात्रुका लागि सिफारिससमेत गर्न सक्ने सुविधा रहेको छ ।

सजिलो रेन्टलमा भएको यो फिचरले यात्रुलाई पनि सेवा तथा यात्राप्रति विश्वस्त बनाउने र चालकलाई थप जिम्मेवार बनाउछ । प्लेटफर्ममा गाडी आउनुअघि चालकको लाइसेन्स, गाडीको बिमालगायतका सम्पूर्ण कागजातहरु चालकले अपलोड गर्नुपर्छ । ती सम्पूर्ण कुराहरु कर्मचारीहरुले भेरिफाई गर्छन् र क्राइटेरिया पूरा गरेको गाडी मात्र सेवाका लागि पर्योग गरिन्छ ।

यसैगरी सवारी चालकको हकमा पनि सजिलो रेन्टलले ठूलो फाइदा पुर्याउने उनको विश्वास छ । परम्परागत रेन्टल सेवामा गाडी चालकहरुले मनपरी भाडा तय गर्ने परम्परा छ । यसमा पनि केही परिवर्तन ल्याउन र चोकचोकमा बसेर यात्रु तान्नुपर्ने बाध्यताबाट चालकहरुले पनि मुक्ति पाउने बताईएको छ ।

चालकहरुले आफूलाई सही लागेको भाडा प्लेटफर्ममा आफैं निर्धारण गर्नुका साथै ग्राहकले आफूलाई मन परेको ठाउँमा जान उपयुक्त भाडा लिने गाडी चयन गर्न सक्छन् । गाडी भाडामा चालक र यात्रु दुवै नठगिनको लागि वैज्ञानिक तरिकाबाट तय गर्ने ‘एल्गोरिदम’ अहिले टिमले विकास गरिरहेको समेत उनले जानकारी दिएका छन् ।

सजिलो रेन्टलले सेवा सुरु गरेको एक महिना मात्र भएता पनि धेरैजना यात्रुहरुबाट एकदमै सकारात्मक प्रतिक्रिया आइरहेको छ । तर, सेवा नयाँ भएका कारण अहिले सजिलो रेन्टलसँग गाडीको पर्याप्त ‘इन्भेन्ट्री’ छैन । पोखरा तथा धनगढीमा पनि आफ्नो ‘इन्भेन्ट्री’ जोड्दै जाने र केही समयभित्र देशका सातै प्रदेशमा गाडीहरुलाई प्लेटफर्ममा ल्याएर सेवा विस्तार गर्ने योजना रहेको छ ।