१३ असार, एजेन्सी। कमेडियन टिकटक प्रयोगकर्ता खाबी लेम केही दिनअघि मात्रै सबैभन्दा बढी टिकटक फलोअर्स हुने व्यक्ति भएका छन्। अमेरिकाका चार्ली डि’एमेलियोलाई पछि पार्दै उनी पहिलो स्थानमा पर्न सफल भएका हुन्।

टिकटकमा उनी चर्चित छन्। बिना आवाजको हुने भएता पनि उनका भिडियोहरू हास्यास्पद हुने भएका कारण सबैमाझ चर्चित छन्।

लेमको जन्म सेनेगलमा भएको हो। उनी एक वर्षको हुँदा नै इटाली सरेका थिए भने अहिले पनि उनको बसाइ त्यहीँ छ। कारखानामा सामान्य कामदारको रूपमा कार्यरत उनी कोरोना भाइरसको महाकारीका कारण लकडाउन भएर फुर्सद भएपछि टिकटकमा लागेका थिए ।

त्यहाँबाट उनी विश्वभर परिचित भएका छन्। विश्वका चर्चित व्यक्तिसँग उनको भेटघाट भइरहन्छ।

अहिले लेमका टिकटकमा १४४.६ मिलियन फलोअर्स छन्। त्यस्तै, उनका भिडियोहरूले २.३ विलियन लाइक पाएका छन्।

टिकटकमा उनी परिचित त छन्। तर, उनले टिकटकबाट कति कमाउँछन् ? यो धेरैको प्रश्न हुनसक्छ।

एक रिपोर्ट अनुसार लेमले अहिलेसम्म १ करोड ३० लाख (१३ मिलियन) अमेरिकी डलर सम्पत्ति कमाएका छन्। उनको यो सबै कमाइको श्रोत टिकटक नै हो।

टिकटकमा पनि उनले ब्राण्ड प्रमोशनबाट सबैभन्दा धेरै पैसा कमाउँछन्। उनले एक पटक प्रमोशन गर्दा ७२ हजार डलर शुल्क लिन्छन्। त्यस्तै, उनको आफ्नै अनलाइन स्टोर पनि रहेको छ।

त्यस्तै, टिकटक फलोअर्सको आधारमा दोश्रो स्थानमा रहेकी डि, एमेलियोले प्रत्येक वर्ष २५ मिलियन डलर कमाइरहेकी छिन्। उनको कमाइको ठूलो हिस्सा पनि ब्राण्ड प्रमोशनले नै ओगटेको छ।