१७ साउन, एजेन्सी। विश्वकै सबैभन्दा धनी व्यक्ति एलन मस्कका बुबाले उनी आफ्नो छोरा एलन मस्कप्रति गर्व नगर्ने बताएका छन्। एलन मस्कका बुबा एरोल मस्कले क्यान्डिड रेडियोसँगको अन्तर्वार्तामा आफ्नो जेठो छोरा (एलन मस्क)प्रति गर्व नगरेको बताएका हुन्।
उनले सोही अन्तर्वार्तामा आफुले चर्चित इलेक्ट्रिक कार टेस्ला समेत नचलाउने बताएका छन्।
अष्ट्रेलियाको क्यान्डिड रेडियोको काइल एण्ड ज्याकी हो शोमा एरोल मस्कले २० मिनेट अन्तर्वार्ता दिएका थिए। सोही समयमा उनले विभिन्न व्यक्तिगत कुराहरू पनि खुलाएका छन्।
अन्तर्वार्तामा एरोललाई उनका छोराले ठूला ठूला काम गरेर अथाह पैसा कमाएका छन्। यसमा गर्व लाग्छ ? भनेर सोधिएको प्रश्नमा उनले उनीहरूको परिवारले लामो समयदेखि नै धेरै कामहरू गर्दै आएका कारण एलन मस्कप्रति गर्व नगर्ने बताएका हुन्।
एरोलले आफ्ना ठूलो छोरा एलन मस्कले ठूलो काम गरेर अर्बपति भएता पनि त्यसबाट आँफुलाई केही फाइदा नभएको पनि खुलासा गरेको डेली मेलमा उल्लेखित छ। तर, उनले सानो छोरा किम्बलप्रति भने गर्व गर्ने बताएका छन्।
उनले किम्बल पनि अर्बपति र एलन मस्ककै हाराहारीमा धनाड्य भएको पनि उल्लेख गरेका छन्।
त्यस्तै, एरोलले पैसाको कमी भएको भन्दै उनले टेस्ला नचलाउने पनि खुलासा गरेका छन्। एरोलले पैसाको अभाव भएकै कारण केहीमा खर्च गर्नुभन्दा अगाडी धेरै प्रश्नको जवाफ दिनुपर्ने पनि बताएका छन्।
