२० साउन, एजेन्सी। एप्पलको प्रतिक्षीत नयाँ फोन आइफोन १४ का बारेमा थप चर्चा चल्न सुरू भएको छ। रिलिज हुने करीब १ महिनाको समय बाँकी हुँदै गर्दा यसका फिचर र मूल्यबारे चर्चाहरू चल्न सुरू गरेका हुन्।
पछिल्लो चर्चा आइफोन १४को मूल्यबारे रहेको छ। कोरियाको एक समाचार एजेन्सी ल्याड्स्कले आइफोन १४को मूल्यबारे केही चर्चाहरू बाहिर ल्याएको हो।
चीनमा लकडाउन भएका कारण सप्लाइ चेन र उत्पादनमा आएको कमीका कारण एप्पलले समस्या झेलिरहेको छ। यी समस्याहरूको कारण कम्पनीले आईफोन १४ सिरीजको मूल्य बढाउन सक्ने विभिन्न सञ्चारमाध्यमहरूले उल्लेख गरेका छन्।
ल्याड्स्कका अनुसार आईफोन १४को सुरूवाती मूल्य ७९९ अमेरिकी डलर हुनेछ। त्यसैगरी, सिरिजका अन्य मोडलहरूमा यसको मूल्य निश्चित रूपमा बढ्नेछ।
आईफोन १४ सिरिज अन्तर्गत आईफोन १४, आईफोन १४ प्रो, आईफोन १४ प्रो म्याक्स सार्वजनिक हुने बताइएको छ। एप्पल प्रो र नन-प्रो मोडलहरू बीच धेरै भिन्नताहरू बनाउन चाहेको मूल्यबाट नै प्रस्ट हुनेछ।
तर, गत महिना द सनमा प्रकाशित एक रिपोर्टले भने आईफोन १४ को सुरूवाती मूल्य ८९९ अमेरिकी डलर हुने बताएको थियो। त्यस्तै, आईफोन १४ प्रोको १०९९ डलर र आईफोन १४ प्रो म्याक्सको ११९९ डलर पर्ने उल्लेख गरिएको थियो।
