२२ साउन, एजेन्सी। एप्पलले आइफोन १४ चीन र भारतमा एकै पटक उत्पादन गर्न सुरू गर्ने बताइएको छ। एप्पलका विश्लेषक मिंङ चि कुवोले एक सर्भेमार्फत भारत र चीनमा एकसाथ आइफोन १४ उत्पादन सुरू गर्ने बताएका हुन्।
प्राय एप्पलले चीनमा पहिले र त्यसपछि अन्य देशमा आइफोन उत्पादन गर्ने गरेको छ। तर, कुवोको अनुमान सहि भएको अवस्थामा चीनसँगै एकसाथ आइफोन उत्पादन गर्ने भारत पहिलो मुलुक बन्नेछ।
एप्पलले चीन भन्दा बाहिर पनि आइफोन १४ को उत्पादन सुरू गरेर जतिसक्दो धेरै आइफोन बजारमा ल्याउन चाहेको कुवोले उल्लेख गरेका छन्। चीनले कोरोना महामारीका कारण आइफोनको उत्पादन घटाएपछि एप्पलले विश्वव्यापी सप्लाइको समस्या भोगेको छ।
विश्वै अर्थतन्त्र त्यति राम्रो नभएको अवस्थामा पनि विश्वव्यापी रूपमा एप्पलका उत्पादनहरूको माग बढिरहेको छ।
