२४ साउन, एजेन्सी। अष्ट्रेलियाले आफ्नै डिजिटल मुद्रा (डिजिटल करेन्सी) ल्याउने भएको छ। अष्ट्रेलियाको रिजर्व बैंकले अष्ट्रेलियामा डिजिटल मुद्राको भविष्यको मूल्याङ्कन गर्न अनुसन्धानका लागि ब्लकचेनमा आधारित आफ्नै डिजिटल मुद्रा ल्याउने भएको हो।
तर, उक्त डिजिटल मुद्रा भने निजी स्तरबाट विकास गरिएका क्रिप्टोकरेन्सीहरू जस्तै बिटक्वाइन, इथेरियम लगायत अन्य भन्दा फरक हुनेछ। अष्ट्रेलियाको रिजर्व बैंकले ल्याउने डिजिटल मुद्रामा भने रिजर्व बैंकको प्रमूख स्वामित्व रहने बताइएको छ।
डिजिटल मुद्राको भविष्य मुल्याङ्कनका लागि रिजर्व बैंकले डिजिटल फाइनान्स कोअपरेटिभ रिसर्च सेन्टरसँग सहकार्य सुरू गर्ने बताएको छ। उक्त अनुसन्धानमा डिजिटल मुद्राको प्रयोजन र यसले दिने आर्थिक फाइदाबारे अध्ययन हुने बताइएको छ।
रिजर्व बैंकले यो अनुसन्धान एक वर्ष लगाएर गर्ने र डिजिटल मुद्राको बारेमा गहन अध्ययन हुने विज्ञप्तीमार्फत जानकारी दिएको छ। त्यस्तै, यो परियोजनामा सहभागी हुन विभिन्न उद्योग तथा कम्पनीहरूलाई सहभागी हुन अनुरोध पनि गरेको छ।
रिजर्व बैंकका सहायक गभर्नर मिचेल बुलकले सेन्ट्रल बैंक डिजिटल करेन्सीका लागि यो महत्वपूर्ण कदम भएको बताएका छन्।
