२ भदाै, काठमाडाैँ । पहिलेको दिनमा आउने नोकिया मोबाइलको ब्याट्री दिन मात्र हैन हप्ताभर सम्म टिक्न सक्थ्यो। आजकलका फोनहरूमा भने एक दिन पनि मुस्किलले टिक्न सक्छ। यदि तपाईँलाई दिनको अधिक समय आफ्नो फोनको आवश्यकता हुन्छ, तर फोनको ब्याट्रीले तपाईँलाई धोका दिन्छ भने अब तपाइले फोनमा केही मिलाएर आफ्नो ब्याट्री लामो समयसम्म टिकाउन सक्नु हुन्छ।
तपाईँले आफ्नो एन्ड्रोइड वा आइफोनलाई लामो समयसम्म टिक्नको लागि यी टिप्सहरू अपनाउन सक्नु हुनेछ। यसले फोनको चार्ज मात्र नभएर ब्याट्री आयुसम्म लम्बाउन सक्नेछ।
फोनको चमक / ब्राइटनेस घटाउने
यो एकदमै नै महत्त्वपूर्ण छ कि तपाइले आफ्नो फोनलाई आवश्यक ब्राइटनेसमा राख्नु पर्दछ। धेरै बढी ब्राइटनेसमा राख्यो भने त्यसले ब्याट्रीको पावर तानेर त्यो उज्यालोलाई बनाइ राख्दछ।
चम्किलो डिस्प्लेले अधिक शक्ति प्रयोग गर्दछ। त्यसैले तपाईँको ब्राइटनेसलाई तल राख्दा वा मधुरो बनाउँदा तपाईँको फोनको ब्याट्री लामो समयसम्म टिक्न सक्छ।
आफूले फोनमा के हेर्नुहुन्छ, त्यो ध्यान दिने
यदि तपाईँ आफ्नो फोनमा चलचित्रहरू र टिभी सोहरू हेर्नु हुन्छ वा खेलहरू खेल्नु हुन्छ भने त अवश्य पनि यस्तो क्रियाकलापले तपाइको ब्याट्री धेरै तानेर चार्ज छिटो सक्काइदिन्छ। तपाईँको स्मार्टफोन ब्याट्री वास्तवमै छिटो समाप्त हुन सक्छ। त्यसैले यदि तपाईँ आफ्नो फोनको ब्याट्रीलाई सकेसम्म लामो समयसम्म टिकाउन चाहनुहुन्छ भने धेरै लोड हुने वा पावर तान्ने काम फोनमा नगरेकै राम्रो। यसले ब्याट्रीको आयु पनि छिटै घटाउँछ। यसको सट्टा डिजिटल पुस्तक पढ्ने वा साधारण गेम खेल्ने गर्न सकिन्छ।
प्रयोग नगरिएका एपहरू बन्द गर्ने
तपाईँले कुनै एप प्रयोग गरिसकेपछि होम बटन थिच्नुहुन्छ र अर्को एप वा कार्यमा लाग्नु हुन्छ। यसले गर्दा तपाइको दिमागमा त्यो एप बन्द भयो र काम गरिरहेको छैन भन्ने हुन्छ। तर वास्तवमा त्यो एयाप अझै पनि तपाईँको फोनबाट शक्ति तान्दै काम गरेको हुन्छ।
धेरै एयापहरूमा यस्तो प्रक्रियाहरू हुन्छन् जुन एप सक्रिय नभएको बेलामा पनि चल्छ। यदि तपाईँसँग एकै समयमा धेरै एपहरु चलिरहेका छन् भने यसले तपाईँको फोनको ब्याट्री पुरै तपाइले थाहा नै नपाइ घटाउन सक्दछ।
अचल वाल पेपर राख्ने
केही फोनहरूमा लाइभ वाल पेपरहरू हुन्छन् जुन हेर्दा त राम्रो हुन सक्छन् तर त्यसैले तपाइको ब्याट्रीको अधिकतम पावर खाइरहेको हुन्छ। यी हलचल गर्ने वालपेपरहरुले धेरै ब्याट्रीहरू निकाल्न सक्छन्। त्यस कारण तपाईँको वाल पेपरलाई स्थिर छविमा परिवर्तन गर्दा तपाईँको फोन धेरै लामो समयसम्म टिक्न सक्ने छ।
अनावश्यक कनेक्सन बन्द गर्ने
फोन हाम्रो लागि डिजिटल संसारसँग जोड्ने एउटा माध्यम हो। तर कनेक्टिभिटीले ब्याट्रीलाई छिट्टै समाप्त गर्दछ। त्यसैले यदि तपाईँ आफ्नो फोनको ब्याट्रीलाई लामो समयसम्म राख्न चाहनुहुन्छ भने तपाईँले त्यस्ता सेटिङहरू स्विच अफ गर्नुपर्दछ।
मोबाइल डेटा, ब्लुटुथ र वाई-फाई कनेक्टिभिटी सबै खुल्ला राख्नको लागि ब्याट्रीको पावर लिन्छ। त्यसैले यदि तपाईँले तिनीहरूलाई प्रयोग गरिरहनुभएको छैन भने यी मध्ये एक वा धेरै स्विच अफ गर्दा राम्रो हुन्छ।
डार्क मोडमा चलाउने
यदि तपाई आफ्नो फोन डार्क मोडमा चलाउन सक्नुहुन्छ भने डार्क मोड तपाईँको फोन ब्याट्रीलाई लामो समयसम्म टिकाउने एक तरिका हुन सक्छ । यसले स्पष्ट रूपमा शक्ति बचत गर्दछ। त्यसैले डार्क मोड प्रयोग गर्दा धेरै ब्याट्री बचत हुन्छ।
ब्याट्री बचत मोड चलाउने
अधिकांश एन्ड्रोइड स्मार्टफोनहरू ब्याट्री बचत मोडको साथ आउँदछन्। तपाईँले यसबाट अनावश्यक एपहरु बन्द गर्न सक्नु हुनेछ। साथै जहाँ तपाइको ब्याट्री अनावश्यक रूपमा खपत भएको हुन्छ, त्यहाँ पावर बचाउने प्रयास गर्दछ। यसले अनावश्यक प्रक्रियाहरू कम गर्दछ। त्यसैले यसबाट हामीले आफ्नो ब्याट्री बचत गर्न सक्छौ।
नोटिफिकेसनहरू बन्द गर्ने
जब तपाईँ कम ब्याट्रीमा चलाउनु हुन्छ, अनावश्यक सूचनाहरू बन्द गर्नाले ब्याट्रीको केही बचत गर्न मद्दत गर्छ। हामीले खासै नचलाउने एयापहरुले बारम्बार नोटिफिकेसन दिने गर्दा केही पावर खपत गर्दछन्। त्यस कारण यदि अनावश्यक एयापहरुले बारम्बार तपाईँलाई नोटिफिकेसन दिन्छन् भने त्यसलाई बन्द गरेर तपाइले केही ब्याट्री बचाउन सक्नु हुनेछ।
