१६ भदाै, काठमाडाैँ । अहिले युवा वर्गमा स्टार्टअपको लहर आएको छ। सबैलाई आफ्नो कम्पनी खोलेर काम गर्न इच्छा लाग्छ। यही लहरमा लागेर कति जना होसै नपुर्याई जस्तो पनि आइडियामा हुत्तिन्छन्। यसले गर्दा उनीहरूको समय, लगानी र मेहनत खेर जान्छ तर उनीहरूको आइडिया पक्कै पनि ठाउँमा लागेको हुँदैन।
कुनै पनि स्टार्टअपको सबैभन्दा मुख्य भाग भनेकै आइडिया वा विचार हो। त्यसपछि त्यही आइडियालाई लिएर एमभिपि बनाइन्छ। त्यही आइडियालाई लिएर बजार अनुसन्धान गरिन्छ। त्यसलाई नै लिएर ल्यान्डिङ पेज बनाइन्छ। यस कारण पनि कुनै पनि स्टार्टअपको मेरुदण्ड नै त्यसको सुरुको बिचार वा आइडिया हो भन्न गलत नहोला।
स्टार्टअपको लागि कसरी आइडिया नखोज्ने?
कुनै पनि आइडिया आफैमा सही र गलत हुँदैन। समय, बजार र माग अनुसार आइडिया स्टार्टअपको लागि ठिक र काम नलाग्ने भन्ने हुन्छ। कुनै पनि स्टार्टअप सुरु गर्नेहरूको लागि सबैभन्दा ठुलो बाधा नै आइडिया ल्याउनु हो।
वास्तवमा यस्तरी स्टार्टअप गर्नेहरू कहिल्यै अघि बढ्न सक्दैनन्। स्टार्टअप सुरु गर्न आइडिया खोज्ने भन्दा पनि आइडिया आएर या कुनै समस्या भोगेर त्यसको समाधानको लागि स्टार्टअप सुरु गर्नु नै यसको सही बाटो हुन्छ।
हरेक स्टार्टअप गर्नेले गर्ने सबैभन्दा ठुलो गल्ती नै यही हो कि उनीहरूले आफूले सोचेको आइडियालाई जबरजस्ती स्टार्टअपको रूप दिन खोज्छन्। यस्तो गर्नाले त्यो आइडियाले सही समस्यालाई समाधान गर्छ कि सक्दैन भन्ने नै अन्दाज हुँदैन।
सही आइडिया कसरी खोज्ने त?
यसको उत्तर जति घुमाएर भने पनि त्यही नै आउँछ। कुनै पनि आइडिया स्टार्टअप भएर सफल हुन यसले सही समय, बजार र माग बुझेको हुन पर्दछ। आज चर्चित टिकटक दश वर्ष अघि आएको भए यस्तो चर्चित हुने थिएन। त्यो सफल हुन धेरै कुराहरूले भूमिका खेले तापनि समयले मुख्य भूमिका खेल्दछ।
त्यसै गरी, जब OYO आयो, त्यस समयमा मानिसहरूलाई त्यसको आवश्यकता त थियो तर त्यस्तो सेवा दिने सजिलो उपाय खासै कुनै थिएन। OYO ले होटेल र ग्राहक बिच पुलको काम गर्यो। यसले गर्दा सबैलाई बुकिङ गर्ने सुविधा कम्पनीको कारण विश्वास बढ्न लाग्यो। अन्त्यमा धेरै व्यक्तिहरू OYO जस्तो सुविधा रुचाउन लागे। यसकै कारण मानिसहरुको धारणा परिवर्तित भयो।
त्यसकारण कुनै पनि समस्यालाई समाधान गर्न बनाइएको स्टार्टअप नै अन्तिममा गएर सफल हुन्छ। यसको लागि हरेक व्यक्तिलाई गएर उनीहरूको समस्या सोध्न सकिँदैन। त्यस कारण सबैभन्दा सही तरिका भनेको आफूले भोगेको समस्यालाई लिएर आइडिया खोज्ने हो।
जब त्यो समस्या तपाईँ आफैले भोग्नु भएको हुन्छ, तब तपाईँलाई थाहा हुन्छ कि समस्या कस्तो प्रकारको हो? कसरी समाधान गर्न सकिन्छ? यो समस्या समाधान गर्न कुन उमेर वर्ग सबैभन्दा बढी लाग्दछन्?
यस्ता प्रश्नले गर्दा तपाइले आफ्नो स्टार्टअपलाई कस्तो बजार र प्रक्रियाबाट लाग्ने भन्ने अन्दाज हुन जान्छ। यसले गर्दा बजार अनुसन्धानको कति पक्ष त यही नै पुरा हुन्छ।
