२२ भदाै, एजेन्सी। होलिडे इनको मालिक कम्पनि इन्टरकन्टिनेन्टल होटल्स ग्रुपले कम्पनीमा साइबर आक्रमण भएको पुष्टि गरेको छ।
विश्वका केही ठूला होटेल चेनहरू भएको आइएचजीले एक विज्ञप्ति जारी गर्दै धेरै प्रविधि प्रणालीहरूमा अनधिकृत पहुँचबारे अनुसन्धान गरिरहेको बताएको छ।
होलिडे इन क्राउन प्लाजा र रिजेन्ट होटलहरू व्यवस्थापन गर्ने बेलायतमा रहेको कम्पनी हो। उक्त कम्पनीले सोमबारदेखि नै बुकिङ च्यानल र अन्य एपहरू अवरुद्ध भएको बताएको छ।
‘आइएचजी जतिसक्दो चाँडो सबै प्रणालीहरू पूर्ण रूपमा पुनर्स्थापित गर्न काम गरिरहेको छ।’ कम्पनीले भनेको छ।
आइएचजीले घटनाको प्रकृति, हद र प्रभावको मूल्याङ्कन गरिरहेको पुष्टि गर्दै घटनाबारे छानबिन गर्न बाह्य विशेषज्ञहरू नियुक्त गर्ने लगायतका योजनाहरू लागू गरेको जानकारी दिएको छ।
अहिले आइएचजीले पछिल्लो घटनाका बारेमा नियामकहरूलाई जानकारी गराएको बताइएको छ।
गत हप्ता पनि यही कम्पनिमा साइबर आक्रमण गरेर डेटा चोरी भएको एक कम्पनिले विज्ञप्ती नै जारी गरेको थियो।
