१ असोज, एजेन्सी। विश्वकै चर्चित राइरशेयरिङ कम्पनी तथा फुड डेलीभरी पार्टनर उबरको सिस्टम ह्याक भएको छ।
राइड हेलिङ कम्पनीले धेरै आन्तरिक सञ्चार र इन्जिनियरिङ प्रणालीमा समस्या देखिएपछि अनुसन्धान गरिरहेको जानकारी समेत दिएको छ।
ह्याकरले पत्रिकामा इमेल, क्लाउड स्टोरेज र कोड रिपोजिटरीका तस्बिरहरू पठाएपछि न्यूयोर्क टाइम्सले पहिलो पटक डाटा लिक भएको रिपोर्ट गरेको थियो।
उबरका कर्मचारीहरूलाई कार्यस्थलको मेसेजिङ एप स्ल्याक प्रयोग नगर्न भनिएको बिबिसीमा उल्लेख गरिएको छ। स्ल्याक अफलाइन हुनुभन्दा अघि उबरका कर्मचारीले ह्याकरको दाबी गर्दै उबरका डाटा चोरी भएको भन्ने म्यासेज पाएका थिए।
ह्याकरले कर्मचारीहरूको आन्तरिक संयन्त्रको समेत जानकारी पाएको बिबिसीमा उल्लेख गरिएको छ। ह्वाकरले उबरका आन्तरिक फोटोहरू समेत पोस्ट गरेको बताइएको छ।
उबरको सवारी साधन, यसका ग्राहक तथा भुक्तानी प्रणालीका डाटा ह्याकबाट प्रभावित भएको कुनै संकेत प्राप्त नभएको रिपोर्ट गरिएको छ।
न्यु योर्क टाइम्सले रिपोर्ट गरे अनुसार यो ह्याकिङमा १८ वर्षीय किशोरको संलग्नता रहेको पाइएको छ। उनी केही वर्षदेखि साइबर सेक्युरिटि स्किलमा काम गरिरहेको बताइएको छ।
ह्याकरले उबरको म्यासेजिङ सिस्टम स्ल्याकमा उबर चालकहरूले धेरै पैसा पाउनुपर्ने भन्दै सन्देश समेत पठाएको बुझिएको छ।
