२ असोज, एजेन्सी। गुगलले भूलबस एक २२ वर्षे ह्याकरलाई २ लाख ५० हजार डलर दिएको खुलासा गरेको छ। २२ वर्षीय साम करीलाई कुनै स्पष्टीकरण बिना उक्त रकम दिइएको खुलासा भएको हो।
करी अमेरिकन नागरिक हुन्। बगबाउन्टी हकर करीले त्यति ठूलो रकम पाएपछि अचम्मित भएको प्रतिक्रिया दिएका छन्।
साइबर सुरक्षाका कमजोरी पत्ता लगाउनमा उनी परिचित छन्। उनले चर्चित कार कम्पनी टेस्लाको झ्यालसँग सम्बन्धित सुरक्षा त्रुटि पत्ता लगाएका थिए। यसपछि उनलाई चिन्नेको संख्या बढिरहेको छ।
टेक जायन्ट गुगलले किन त्यति धेरै रकम दियो भनेर अचम्मित भएको करीले बताएका छन्।
करीलाई गुगलले करीब ३ हप्ताअघि उक्त रकम दिएको थियो। त्यसपछि उनले ट्विटरमा स्क्रिनसट सहित किन रकम दिइयो भन्नेबारे सवाल उठाएका छन्।
अमेरिकी समाचार आउटलेट एनपीआरका अनुसार करीलाई कहिलेकाहीँ गुगललाई उनीहरूको सफ्टवेयरमा कमजोरीहरू फेला पार्न मद्दत गरेबापत पैसा दिइरहेको हुन्छ। तर, करीको खातामा जम्मा भएको रकम ति कामहरूसँग सम्बन्धित नभएको उनको विश्वास छ।
करीले कुनै दिन गुगलले पैसा फिर्ता माग्नसक्ने बताउँदै उक्त रकम कतै खर्च नगरेको बताएका छन्। तर, करको प्रक्रियाबाट बच्न अन्य खातामा स्थानान्तरण गर्नु पर्ने बेला भएका कारण उनले यसबारे खुलासा गरेको एनपीआरले रिपोर्ट गरेको छ।
गुगलका प्रवक्ताले अरूलाई दिनुपर्ने पैसा भुलबस करीको खातामा गएको बताएका छन्। उनले यसलाई मानवीय त्रुटिका रूपमा स्वीकार्न पनि अनुरोध गरेका छन्।
