४ असोन, एजेन्सी। ग्रान्ड थेफ्ट अटो फ्रान्चाइजीको अर्को संस्करणका ९० भन्दा बढी भिडियो र तस्बिरहरू ह्याकरद्वारा अनलाइन लिक गरिएको छ। चर्चित गेमका विकासकर्ताहरूले यो पुष्टि गरेका छन्।
आइतबार यस गेमको नयाँ संस्करण Grand Theft Auto VI का ९० वटा भिडियो र तस्बीरहरू सहितको सामग्री पोस्ट गरिएको हो। यसलाई गेमिङको सबैभन्दा ठूलो सुरक्षा उल्लङ्घनको रूपमा वर्णन गरिएको छ।
रकस्टार गेम्सले नेटवर्कमा कसरी समस्या दखियो भन्ने अस्पष्ट रहेको बताएता पनि GTA VI का सुरूवाती भिडियो फुटेजहरू चोरी भएको पुष्टि गरेको छ।
GTAForums साइटमा teapotuberhacker नाम भएका प्रयोगकर्ताहरूले फुटेजहरू पोस्ट गरेका थिए।
ह्याकरले स्ल्याक मेसेजिङ एपमा रकस्टारको आन्तरिक फिड नियन्त्रणमा लिएरडाटामा पहुँच प्राप्त गरेको दाबी गरेको छ। त्यस्तै, थप सामग्रीहरू पनि लिक गर्ने धम्की दिँदै वार्ता गर्न बोलाएको छ।
अब भने GTA 5 र GTA 6 दुबैका सोर्स कोड, प्रोपर्टिज र टेस्टिङ बिल्डहरू लिक गर्ने र यसले कम्पनीलाई ठूलो हानी हुने पनि दाबी गरिएको छ।
भिडियोहरू लिक भएको पहिलो पोस्ट मोडेरेटरले हटाइसकेको भएता पनि सामाजिक सञ्जालमा व्यापक फैलिइरहेको छ। त्यस्तै, रकस्टारले युट्युब र ट्विटरबाट फुटेज हटाउन टेकडाउन आदेश समेत जारी गरेको छ।
GTA 5 ले २०१३ मा रिलिज भएदेखि १७० मिलियन भन्दा बढी प्रतिहरू बेचेको छ। यसलाई अहिलेसम्म कै सबैभन्दा चर्चित भिडियो गेमको रूपमा लिइन्छ। रकस्टार गेमिङले GTA 6 २०२४ देखि २०२५ को बिचमा रिलिज गर्ने तयारी गरिरहेको छ।
