४ असोज, पोखरा। एटिएम मेसिन फुटाउँदै गरेको अवस्थामा एक जना पक्राउ परेका छन्। पोखराको लेकसाइडस्थित बाराही चोकमा रहेको एनएमबी बैंकको एटिएम फुटाउँदै गर्दा एक व्यक्ति पक्राउ परेका हुन्।
पक्राउ पर्नेमा धादिङ त्रिपुरा सुन्दरी गाउँपालिका-५ सल्यानटार घर भएका २५ वर्षीय मनोज कुमाल रहेका छन्। उनी सोमबार राती समातिएका हुन्।
एक जना पुरुषले एटिएम फुटाइरहेको भन्ने खबर प्राप्त हुनासाथ वडा प्रहरी कार्यालय बैदामबाट खटिएको प्रहरीले उनलाई एटिएम फुटाउँदै गरेको अवस्थामा १ थान खुकुरी सहित फेला पारी पक्राउ गरेको जानकारी दिएको छ।
यस सम्बन्धमा प्रहरीले थप अनुसन्धान गरिरहेको छ।
