९ असोज, काठमाडाैँ। विश्वका धेरै देशमा प्रदर्शन भइरहेको नेपाली फिल्म ‘प्रेमगीत-३’को हिन्दी भर्सन लिक भएको छ। विभिन्न पाइरेटेड साइट र टेलिग्राममा फिल्मको हलप्रिन्ट लिक भएको हो।
अनलाइनमा केही प्रयोगकर्ताहरूले केही मिनेटका क्लिप सार्वजनिक हुँदा केहीमा भने पुरै फिल्म नै लिक गरिएको छ।
भारत लगायत अन्य मुलुकमा हिन्दी भाषामा शुक्रबारबाट नै रिलिज भएको फिल्म नेपालमा भने हिन्दी डबिङ भोलीदेखि मात्रै रिलिज हुने तयारी छ।
पछिल्लो समय अनलाइनमा फिल्म लिक हुने क्रम बढिरहँदा यो पटक भने नेपाली फिल्मको हिन्दी डबिङ यसको शिकार भएको छ। प्रेमगीत-३ हिन्दीमा डब भएर भारतमा प्रदर्शन भएको पहिलो चलचित्र भएको निर्माताको दाबी छ।
