३१ असोज, एजेन्सी। माइक्रोसफ्टले विन्डोज १२ का केही विवरणहरू सार्वजनिक गरेको रिपोर्टहरूले दाबी गरेका छन्। पछिल्ला दिनका प्रकाशित रिपोर्टहरूले विन्डोज १२ का केही फिचरहरू माइक्रोसफ्टले झुक्किएर सार्वजनिक गरेको दाबी गरेका हुन्।
विभिन्न रिपोर्टको दाबी अनुसार माइक्रोसफ्टबाटै भएको लिक विन्डोज १२ को प्रयोगकर्ता इन्टरफेस डिजाइनको प्रोटोटाइप हो।
माइक्रोसफ्टले विन्डोजको अर्को संस्करणको बारेमा अझै केही घोषणा गरेको छैन। तर पछिल्लो तीन महिनामा यो दोस्रो पटक विन्डोज १२ का केही विवरण लिक भएको दाबी गरिएको छ।
विन्डोज सेन्ट्रलको ज्याक वोडनले एउटा तस्बिर सार्वजनिक गरेको छ जसमा विन्डोजको अपडेटेड युआइ फिचर देखाइएको छ।
सोही तस्बिरमा अन्य नयाँ फिचर वा अपडेटको बारेमा पनि खुलासा गरिएको छ। जसमा तल्लो भागमा फ्लोटिङ टास्कबार, माथिल्लो-बीच भागमा फ्लोटिङ सर्च बक्स, माथिल्लो बायाँ भागमा माैसम सम्बन्धि विवरण र विजगेट तथा मिति र समय भने माथिल्लो दाया भागमा रहने देखाइएको छ।
ज्याक वोडनको दाबी अनुसार विन्डोजको पछिल्लो भर्सनमा धेरै परिवर्तन तथा अपडेट हुने अपेक्षा गरिएको छ। विन्डोज १२ को कोडनेम भने ‘नेक्स्ट भ्याली’ रहने बताइएको छ।
विन्डोज १२ लन्च हुन अझै २ वर्ष बाँकी रहेको छ। २०२४ मा विन्डोज १२ लन्च हुने हल्ला भने बढिरहेको छ। तर, यसमा हुने केही फिचरबारे विवरण सार्वजनिक हुन भने सुरू भइसकेको छ।
