१८ कार्तिक, एजेन्सी। अमेरिकी टेक कम्पनि एप्पलको मूल्य (मार्केट भ्यालु) अल्फाबेट, अमेजन र मेटाको संयुक्त मूल्य भन्दा पनि बढी भएको छ। बिजनेश इन्साइडरका अनुसार एप्पलको मार्केट भ्यालु २.३०७ ट्रिलियन डलर पुगेको छ।
त्यस्तै, अर्का तीन ठूला टेक कम्पनि अल्फाबेट, अमेजन र मेटाको संयुक्त मार्केट भ्यालु २.३०६ ट्रिलियन डलर मात्रै रहेको छ। गुगलको मातृ कम्पनि अल्फाबेटको मार्केट भ्यालु १.१२६ ट्रिलियन डलर, अमेजनको ९३९.७८ बिलियन डलर र फेसबुकको मातृ कम्पनि मेटाको २४०.०७ बिलियन डलर मार्केट भ्यालु रहेको याहु फाइनान्सको डाटाले देखाएको छ।
पछिल्लो त्रैमासिकमा ठूला टेक कम्पनिहरूको शेयर मूल्यमा गिरावट हुँदा एप्पल भने उकालो लागिरहेको छ। एप्पलले वाल स्ट्रिट जर्नलले प्रक्षेपण गरेको खुद नाफा पनि पार गरेको छ।
यस नतिजासँगै एप्पलको शेयर ८ प्रतिशतले बढेको थियो। तर, मेटाको शेयर २० प्रतिशतले झर्यो भने अमेजनको शेयरमा १० प्रतिशतको गिरावट देखिएको थियो। त्यस्तै, अल्फाबेटको शेयर भने एकल अंकमा गिरावट भएको थियो।
