२४ कार्तिक, एजेन्सी। अमेरिकी इकमर्स कम्पनी अमेजन १० खर्ब डलर गुमाउने विश्वकै पहिलो पब्लिक कम्पनी भएको छ। बढ्दो मुद्रास्फिति र कडा माैद्रिक नीतिका कारण यो कम्पनीले यसै वर्ष १० खर्ब डलर गगुमाएको हो।
बुधबार यस कम्पनीको शेयरमा ४.३ प्रतिशतको गिरावट देखिएको छ। शेयरमा भारी गिरावट भएसँगै जुलाइमा १.८८ ट्रिलियन डलर भएको यो कम्पनीको अहिले मार्केट भ्यालु ८७९ बिलियन डलरमा खुम्चिएको छ। गत वर्षको नोभेम्बरसम्म माइक्रोसफ्ट र अमेजनको मार्केट भ्यालुमा ठूलो प्रतिस्पर्धा थियो। तर, एक वर्षको अन्तरालमा माइक्रोसफ्टको भ्यालु १.७९ ट्रिलियन डलरमा खुम्चिँदा अमेजनको ८७९ बिलियन डलरमा झरेको छ। एक वर्षमा माइक्रोसफ्टले ८८९ बिलियन डलर गुमाएको छ।
यो वर्षमा अमेरिकाका पाँच ठूला टेक कम्पनिले ४ ट्रिलियन डलर गुमाएका छन्।
विश्वकै सबैभन्दा ठूलो अनलाइन रिटेलर अमेजनले कोरोना महामारीको समयमा व्यापक नाफा कमाएको थियो। तर, महामारी साम्य हुँदै जादा अनलाइन किनबेच खस्किएपछि गत हप्ता अमेजनले इतिहासकै सबैभन्दा कम नाफा वृद्धिदरको सामना गरेको थियो।
