२७ कार्तिक, एजेन्सी। एक व्यक्तिले आइफोनको फोल्डेबल फोन बनाइदिएका छन्। चीनका एक युट्युबरले आइफोन एक्स मोडलको फोल्डेबल फोन बनाइदिएका हुन्।
उनले यसका लागि २०१९ मा लन्च भएको मोटोरोला रेजर फोनको पनि प्रयोग गरेको बताइएको छ।
चिनियाँ युट्युबरले उनको च्यानल टेक एस्थेटिक्समा केही दिन अघि आइफोनको फोल्डेबल मोडल सार्वजनिक गरेका हुन्। उनी र उनको टीम मिलेर करीब १ वर्ष लगाएर उक्त फोन निर्माण गरेको जानकारी दिइएको छ।
उनले फोल्डेबल फोनको च्यासिसका लागि भने मोटोरोला रेजर फोनको प्रयोग गरेका छन्। युट्युबमा सार्वजनिक भएको भिडियोमा उनले बनाएको फोनले पूर्ण रूपमा काम गरेको देखाइएको छ।
उनले बनाएको उक्त आइफोनको नाम ‘आइफोन भी‘ राखेका छन्। यो फोन भि आकारमा फोल्ड गर्न मिल्ने भएका कारण यो नाम राखिएको उनले बताएका छन्।
यो फोन आइओएस अरेटिङ सिस्टममा नै चल्ने बताइएको छ।
अहिलेसम्म आइफोनका फोल्डेबल फोन सार्वजनिक हुने कुनै समाचार भने बाहिर आएका छैनन्। तर, २०२५ सम्म फोल्डेबल आइप्याड सार्वजनिक गर्ने तयारीमा भने एप्पल रहेको बुझिएको छ।
