३ मंसिर, एजेन्सी। ट्विटरले कर्मचारीहरूलाई कम्पनीको कार्यालय भवनहरू अस्थायी रूपमा बन्द गरिने बताएको छ। ट्विटरले यो निर्णय तत्काल कार्यान्वयन हुने पनि जानकारी गराएको छ।
ट्विटरले कर्मचारीहरूलाई पठाएको म्यासेजमा ट्विटरको कार्यालय २२ नोभेम्बरमा पुनः खुल्ने बताइएको छ। तर, कार्यालय बन्द गर्नुपर्ने कारण भने खुलाइएको छैन।
ट्विटरका नयाँ मालिक एलन मस्कले कर्मचारीहरूलाई लामो समयसम्म काम गर्न वा छोड्न आह्वान गरेपछि ठूलो संख्यामा कर्मचारीहरूले काम छोडेको रिपोर्टहरू बीच यो घोषणा आएको हो।
‘कृपया सामाजिक सञ्जाल, प्रेस वा अन्य ठाउँमा कम्पनीको गोप्य जानकारीबारे छलफल नगरी कम्पनी नीतिको पालना गर्न जारी राख्नुहोस्।’ ट्विटरले पठाएको म्यासेजमा भनिएको छ।
मस्कले ट्वीटरका कर्मचारीहरूलाई उनीहरूले लामो समयसम्म काम गर्न प्रतिबद्ध हुनु हुनुपर्ने वा कम्पनी छोड्नुपर्ने बताएको रिपोर्टहरू सार्वजनिक भएका थिए।
मस्कले कम्पनीमा काम गर्न चाहने कर्मचारीहरू कम्पनीको बाचामा सहमत हुनुपर्ने मेल पठाएको वासिङटन पोस्टमा उल्लेख गरिएको छ। बिहीबार १७ नोभेम्बर सम्म साइन अप नगर्नेहरूलाई तीन महिनाको छुट्टै तलब दिइने पनि मस्कले बताएका थिए।
यस महिनाको सुरुमा कम्पनीले आफ्ना लगभग ५० प्रतिशत कर्मचारी कटौती गरिरहेको बताएको थियो।
ट्विटरले आफ्नो कार्यालयहरू अस्थायी रूपमा बन्द गरेको आजको घोषणाले मस्कको नयाँ सर्तहरू स्वीकार नगरेको कारण ठूलो संख्यामा कामदारहरूले राजीनामा दिएको हुनसक्ने अनुमान गरिएको छ।
