१८ मंसिर, काठमाडाैँ। नेपाल विद्युत् प्राधिकरणको पोलमा अव्यवस्थित तरिकाले तानिएका र प्रयोगमा नरहेका तार तथा उपकरणहरू हटाउन पटकपटक ताकेता गरे पनि केबल टिभी तथा इन्टरनेट सेवाप्रदायकहरूले अटेरी गरेका छन् । कात्तिक १५ गते प्राधिकरणले ४५ दिनको समय दिएर तार तथा उपकरण व्यवस्थित गर्न चेतावनी दिएको थियो ।
सूचना प्रकाशित भएको ३३ दिनसम्म पनि उनीहरूले कुनै चासो नदिएको प्राधिकरणले जानकारी दिएको छ । निर्धारित अवधिसम्म सुधार कार्य नभएमा प्राधिकरण आफैंले तार हटाउने र यसबाट हुनसक्ने नोक्सानीका लागि केबल/इन्टरनेट/दूरसञ्चार सेवा प्रदायक आफैं जिम्मेवार हुने प्राधिकरणको भनाइ छ ।
सेवा प्रदायकहरूले निर्धारित समयावधि भित्र केवल व्यवस्थापन नगरे ने. वि. प्रा. ऐन, २०४१ को दफा १९ (ख) र १९ (छ) बमोजिम ने. वि. प्रा. आफैँले हटाउँदा हुने क्षतिका लागि इन्टरनेट तथा टि. भी सेवा प्रदायक स्वयम् जिम्मेवारी हुने समेत चेतावनी दिएको छ।
