१९ मंसिर, काठमाडाैँ। नेपाली पब्जी टोली डिआरएस गेमिङ पब्जि मोबाइल गेमिङको सबैभन्दा ठूलो प्रतियोगिता पब्जि मोबाइल ग्लोबल च्याम्पियनसिप (पिएमजिसी)को फाइनल खेल्ने भएको छ।

फाइनल क्वालिफायर अन्तर्गत लास्ट चान्सको दोश्रो दिनको खेलबाट अंक तालिकाको चाैथो स्थानमा बस्न सफल भएपछि डिआरएस पिएमजिसीको फाइनलमा पुगेको हो। लिग स्टेज हुँदै सर्भाइभल स्टेज खेलेर लास्ट चान्सको शीर्ष पाँच स्थानमा पर्न सफल टोलीले पिएमजिसीको फाइनल खेल्न पाउने नियम थियो।

लास्ट चान्समा डिआरएस १११ अंक सहित चाैथो स्थानमा रहन सफल भयो। डिआरएसले किल मार्फत ३८ र प्लेसमेन्टमार्फत ७३ अंक पाएको थियो। अंक तालिकाको शीर्ष स्थानमा रहेको अल्फा सेभेनले १६३ अंक बटुलेको छ।

यसअघि नै नेपालको ट्रेन्ड टु किल (टिटुके) पिएमजिसीको फाइनलका लागि छनाैट भइसकेको छ। टिटुके समूह चरणबाट सिधै फाइनलका लागि छनाैट भएको हो।

त्यस्तै, अर्को नेपाली टोली स्काइलाइट्ज गेमिङ भने सर्भाइभल स्टेजबाटै बाहिरिएको छ।

यस संस्करणको पिएमजिसी फाइनलमा नेपालका २ टोलीले प्रतिस्पर्धा गर्ने भएका छन्। पिएमजिसीको फाइनल जनवरी ६ देखि ८ तारिखसम्म इन्डोनेसियाको जाकार्तामा हुनेछ।