५ पुस, एजेन्सी। अर्जेन्टिनी फुटबल टोलीका कप्तान लियोनल मेसीको पोस्टले इन्स्टाग्राममा नयाँ रेकर्ड कायम गरेको छ। मेसीले विश्वकपको उपाधि जितेपछि गरेको पहिलो पोस्ट इन्स्टाग्राममा सबैभन्दा धेरै लाइक गरिने पोस्ट भएको छ।
२ दिनअघि गरेको मेसीको पोस्टमा यो सामग्री तयार पार्दासम्म ५ करोड ६० लाख लाइक पुगिसकेको छ। यसभन्दा अघि एउटा अण्डाको फोटोमा ५ करोड ५० लाख लाइकको रेकर्ड थियो।
आइतबार कतारको लुसेल रंगशालामा भएको फाइनल खेलमा फ्रान्सलाई पेनाल्टी सुटआउटमा पराजित गर्दै अर्जेन्टिनाले विश्वकपको उपाधि जितेको थियो। विश्वकपको उपाधिसँगै ३५ वर्षीय मेसीले फुटबल प्रतियोगितामा जित्नुपर्ने सबै ट्रफी जितिसकेका छन्।
मेसीले विश्वकप २०२२ मा उत्कृष्ट खेलाडीको अवार्ड पनि जितेका छन्। २ संस्करणमा उत्कृष्ट खेलाडीको अवार्ड जित्ने मेसी एक्ला खेलाडी हुन्।
मेसीको इन्स्टाग्राममा ४० करोडभन्दा बढी फलोअर्स पुगेका छन्। उनीभन्दा अगाडी पोर्चुगलमा स्टार खेलाडी रोनाल्डो रहेका छन्। रोनाल्डोका भने इन्स्टाग्राममा ५२ करोड भन्दा बढी फलोअर्स रहेका छन्।
