‘प्रमुख आर्थिक सूचकको प्रयोग विधि’ डिजिटल पुस्तक सार्वजनिक

२० पुस, काठमाडाैँ। राष्ट्रिय योजना आयोगले ‘प्रमुख आर्थिक सूचकको प्रयोग विधि’ नामक डिजिटल पुस्तक सार्वजनिक गरेको छ । आयोगले मङ्गलबार एक कार्यक्रमबीच उक्त पुस्तक सार्वजनिक गरेको हो ।

यो पुस्तक योजना आयोगको अग्रसरतामा राष्ट्रिय तथ्यांक कार्यालय, विकासका लागि तथ्यांक कार्यक्रम, द एशिया फाउण्डेशन र नेपाल इन डाटाले संयुक्त रुपमा तयार पारेको हो । राष्ट्रिय योजना आयोगका सचिव केवलप्रसाद भण्डारीले सही तथ्यांक प्राप्ति र त्यसको विश्लेषणमा ठूलो खाडल महशुस भएपछि यो डिजिटल पुस्तक प्रकाशनमा ल्याइएको बताए ।

सबै नीति तथा योजना निर्माणको आधार तथ्यांक भएकाले यसको विश्लेषण तथ्यपूरक हुनुपर्ने आवश्यकता उनले औँल्याए । ‘तथ्यांकको प्रस्तुती कसरी गर्ने भनेर स्पष्ट पार्न यो प्रकाशन ल्याइएको हो । तथ्यांकको परिभाषादेखि यसको संकलन, प्रशोधन, ब्याख्या, र विश्लेषण विधिसम्म समेटिएकाले यो एउटा महत्वपूर्ण पुस्तक हो भन्ने मलाई लागेको छ’, सचिव भण्डारीले भने ।

पुस्तक सार्वजनिक कार्यक्रममा राष्ट्रिय तथ्यांक कार्यालयका सहसचिव नेबिल लाल श्रेष्ठले आर्थिक क्षेत्रसँग जोडिएका हरेक तथ्यांकको परिभाषासहितको एकीकृत जानकारी पाउने गरी यो प्रकाशन तयार पारिएको बताए । त्यस्तै, नीति निर्माता, अध्ययन–अनुसन्धान कर्ता, सार्वजनिक निकाय, पत्रकारिता क्षेत्र, शैक्षिक क्षेत्रलगायत विभिन्न क्षेत्रमा तथ्यांकको गलत विश्लेषण नहोस् भन्ने उद्देश्य राखेर यो पुस्तक तयार पारिएको पनि उनको भनाइ छ ।

‘तथ्यांकको सही प्रयोग होस् र गलत ब्याख्या नहोस् भनेर यो प्रकाशन ल्याइएको हो । सबै तथ्यांकसँग कुनै कथा लुकेको हुन्छ । हामीले प्रयोग गरिरहेको तथ्यांक उत्पादन कसरी भयो ? त्यसको विधि के हो ? त्यसको अवधारणा र परिभाषाबारे स्पष्ट हुन जरुरी छ’, उनले भने । जुनसुकै नीति निर्माणका लागि प्रयोग हुने तथ्यांकको अवधारणा र परिभाषा बुझ्न सकेमा मात्रै हामीले प्रयोग गरेको तथ्यांक प्रभावकारी हुने श्रेष्ठको भनाइ छ । रासस

AUTHOR