३० चैत, एजेन्सी । चर्चित माइक्रोब्लगिङ साइट ट्विटरका मालिक एलन मस्कले ट्विटरको स्वामित्व लिनु पिडादायी भएको बताएका छन् । बिबिसीसँगको अन्तर्वार्ताका क्रममा ट्विटरको मालिक बन्नु पिडादायी भएको बताएका हुन् ।
मंगलबार सार्वजनिक भएको अन्तर्वार्तामा मस्कले प्लेटफर्मको आफ्नो स्वामित्वको बारेमा छलफल गरेका छन् । जसमा उनले कर्मचारी कटाैती, गलत सुचना प्रवाह र कार्यशैलीको बारेमा समेत खुलाएका छन् ।
‘ट्विटरको मालिक बन्नु बोरिंग छैन तर, ठूलो उतारचढाव भने छ’ उनले सानफ्रान्सिस्कोमा रहेको हेडक्वार्टरमा भने ।
टेस्ला र स्पेसएक्सको मालिक मस्कसँग अन्तर्वार्ता लिने बिबिसीले ठूलो अवसर पाएको बताइएको छ । सामान्यतया उनले अन्तर्वार्ताका लागि मिडियाको आग्रह लत्याइरहेका हुन्छन् ।
गत वर्ष ४४ अर्ब डलरमा ट्विटर खरिद गरेपछि मस्कले कम्पनीको सञ्जार विभाग नै हटाएका छन् ।
तर, बिबिसीको अन्तर्वार्तामा उनले कहिलेकाही अफिसको सोफामा नै सुत्नुपरेको समेत बताएका छन् । मस्कले ट्विटर खरिदबाट ठूलो घाटा व्यहोरेको समेत विभिन्न रिपोर्टहरू सार्वजनिक भएका छन् ।
मस्कले कम्पनीको खर्च घटाउन ठूलो संख्यामा कर्मचारी कटाैती गरिसकेका छन् । मस्कले खरिद गर्नुअघि ८००० कर्मचारी भएको ट्विटरमा अहिले जम्मा १५०० जना मात्रै भएको बताइएको छ ।
