१२ वैशाख, विराटनगर । विराटनगर महानगरपालिकाका नागरिकहरूले राष्ट्रिय परिचयपत्र आफ्नै घर आँगनमा प्राप्त गर्ने उद्देश्यले आजदेखि विवरण सङ्कलन तालिम एवं अभिमुखीकरण सुरु गरिएको छ ।
राष्ट्रिय परिचयपत्र विवरण सङ्कलन कार्यक्रम÷अभियानको कार्यक्रम–२०८० अन्तर्गत नगरका १९ वडामा नागरिकको चापअनुसार आगामी असार मसान्तसम्म विवरण सङ्कलन गर्ने कार्य सञ्चालन हुनेछ ।
नगर क्षेत्रमा शुक्रबारदेखि सुरु हुने परिचयपत्र विवरण सङ्कन गर्ने कार्य प्रत्येक वडाका दुईदेखि तीन स्थानमा गर्नका लागि आवश्यक जनशक्तिलाई तालिम तथा अभिमुखीकरण सुरु गरिएको छ ।
मोरङ जिल्लाको १७ पालिकामध्ये यसअघि नै १६ पालिकामा परिचयपत्र विवरण अभियान सुरु भइसकेको छ ।
महानगरपालिकाका प्रमुख नागेश कोइरालाले स्थानीय पालिकाले पाउने अधिकारअन्तर्गत राष्ट्रिय परिचयपत्र नागरिकले आफ्नै घरआँगनमा सहज ढङ्गले प्राप्त गर्नु उपलब्धिमूलक भएको विचार व्यक्त गरे ।
मोरङका प्रमुख जिल्ला अधिकारी तीर्थराज भट्टराईले नेपाली नागरिकताका आधारमा परिचयपत्रको विवरण सङ्कलन गर्नुपर्ने आवश्यकता औँल्याउँदै बढीभन्दा बढी जनताले सहज र सरलरूपमा सेवा प्राप्त गर्न सफल भएमा नगर र जिल्ला समृद्ध हुने धारणा राखे ।
मोरङका सहायक प्रजिअ शरदकुमार पोखरेलले जिल्लामा चार लाख तीन हजार विवरण सङ्कलन भएको जानकारी दिँदै जिल्ला प्रशासन कार्यालय मोरङले दैनिक दुई सय ५० नागरिकको विवरण सङ्कलन गर्ने गरेको बताए ।
