८ श्रावण, एजेन्सी । चर्चित सामाजिक सञ्जाल ट्विटरको लोगो परिवर्तन भएको छ । ट्विटरका मालिक एलन मस्कले चराको ठाउँमा अंग्रेजीको एक्स ‘X’ राखेका हुन् ।
व्यवसायको नाम परिवर्तन गरेर एक्स कर्प राखेका श्री मस्कले यो परिवर्तन लामो समय अगाडी नै गरिनु पर्ने बताएका थिए । ट्विटरकी सीईओ लिन्डा याकारिनोले पनि आज लोगो परिवर्तन गर्नेबारे घोषणा गरेकी थिइन् ।
विभिन्न रिपोर्टहरूका अनुसार संसारकै सबैभन्दा धनी व्यक्ति मस्कले चीनको ‘वीच्याट’ मिल्दोजुल्दो ‘एक्स’ नामक “सुपर एप” समेत बनाउन चाहिरहेका छन् ।
उनले आइतवार ट्वीटरको लोगो परिवर्तन गर्न चाहेको बताउँदै क्रमशः ब्राण्डबाट चराको बिदाइ गर्ने जानकारी दिएका थिए ।
मस्कले अक्टोबर २०२२ मा ट्विटर खरिद गरेदेखि कम्पनीले आफ्नो व्यवसायको नाम परिवर्तन गरी एक्स कर्प राखेको छ ।
ट्विटरको वेबसाइटले नीलो चरालाई चित्रण गर्ने यसको लोगोबारे भनेको छ, ‘यो हाम्रो सबैभन्दा परिचित लोगो हो । त्यसैले हामी यसको धेरै सुरक्षा गर्छौं ।’
