काठमाडौँ महानगरपालिकाले विद्यालय बन्द गरेर आन्दोलनमा उत्रिने शिक्षकलाई कारबाही गर्ने भएको छ ।
नेपाल शिक्षक महासंघको नेतृत्वमा राजधानी काठमाडौँ केन्द्रित भई आन्दोलन भइरहेका बेला महानगरले विद्यालय बन्द गरी पठनपाठनमा समस्या परेको खण्डमा शिक्षकहरूमाथि कारबाही गर्ने जनाएको हो ।
काठमाडौँ महानगरपालिकाले शिक्षा विभागलाई आवश्यक अनुगमन गरेर कारबाही गर्न निर्देशन दिईसकेको महानगरका प्रेस संयोजक सुरेन्द्र बजगाईँले बताए । ‘आन्दोलन गर्न पाउनु शिक्षकहरूको अधिकारको कुरा हो । तर, आन्दोलनको नाममा विद्यालय नै बन्द गरिनुहुन्न ।’, उनले भने, ‘विद्यालय बन्द गरियो भने कारबाही गर्न महानगरले शिक्षा विभागलाई निर्देशन दिएको छ’।
नेपाल शिक्षक महासङ्घले विद्यालय शिक्षासम्बन्धी विधेयकमा असन्तुष्टि जनाउँदै आजदेखि काठमाडौँको माइतीघर मण्डलामा धर्ना सुरु गरेको छ । महासङ्घले अस्थायी प्रकृतिका शिक्षकहरुको स्थायित्व, विद्यालय कर्मचारीको दरबन्दी सृजना, विद्यालय संरचनाबाहिर रहेका बाल कक्षा शिक्षक, अस्थायी अवधि गणना तथा निवृत्तिभरण, शिक्षक बढुवा, प्रधानाध्यापक नियुक्ति, सरुवा र कार्यसम्पादन मूल्याङ्कन लगायतका विषयमा सम्बोधन माग गर्दै आएको छ ।
