काठमाडौँ। शुक्रबार बिहान ८ बजेदेखि देशभरका अधिकांश सरकारी वेबसाइटहरू बन्द भएका छन्, जसले नागरिकलाई आवश्यक सूचना र सेवा लिन कठिन बनाएको छ।
डीएनएस सर्भरमा आएको खराबीका कारण अधिकांश वेबसाइट पूर्ण रूपमा बन्द छन् भने केही समय-समयमा खुल्ने र बन्द हुने अवस्थामा छन्। प्रयोगकर्ताले वेबसाइट खोल्दा “This site cannot be reached” भन्ने सन्देश देखिरहेका छन्।
सिंहदरवारस्थित एकीकृत डाटा व्यवस्थापन केन्द्रको ट्रान्सफर्मर स्वीचमा समस्या आएपछि विद्युत आपूर्तिमा अवरोध भएको र करिब २ घण्टा सेवा रोकिने सूचना दिइएको थियो। तर समाचार तयार पार्दासम्म पनि वेबसाइटहरू ठप्प नै छन्। राष्ट्रिय सूचना प्रविधि केन्द्र, सिडिएस एण्ड क्लियरिङ लिमिटेड, संघ, प्रदेश र स्थानीय तहका धेरै साइटहरू प्रभावित भएका छन्।
