काठमाडौं। गुगलका सीईओ सुन्दर पिचाईले गुगलको शक्तिशाली एआई प्रणाली जेमिनी निकट भविष्यमा आइफोनमा प्रयोग गर्न सकिने बताएका छन्।
गुगल र एप्पलबीच यस विषयमा छलफल भइरहेको छ र सन् २०२५ को मध्यसम्म सम्झौता हुन सक्ने अनुमान गरिएको छ। यदि सम्झौता भयो भने, जेमिनी एआईको एकीकरण आईओएसका आगामी अपडेट (जस्तै iOS 18.2) मार्फत हुनेछ, जसले प्रयोगकर्तालाई सिरीसँगै जेमिनी एआई प्रयोग गर्ने सुविधा दिनेछ।
हाल सिरीले केही उत्तरहरू दिन नसक्दा च्याटजीपीटीको सहायता लिन्छे। सम्झौता भएपछि, जेमिनी एआई पनि अर्को विकल्प बन्नेछ। हाल प्रयोगकर्ताले जेमिनी प्रयोग गर्न एप डाउनलोड गर्नुपर्छ, तर सम्झौता भएमा जेमिनी इनबिल्ट रूपमा आइफोनमा उपलब्ध हुनेछ।
यसले लेखन, जानकारी खोज, संवाद जस्ता सुविधामा प्रयोगकर्तालाई स्मार्ट अनुभव दिनेछ। एप्पल पनि सिरीलाई स्मार्ट बनाउन सिरी 2.0 मा काम गरिरहेको छ, तर यो प्रोजेक्ट हाललाई स्थगित छ। जेमिनीको एकीकरणले सिरीलाई थप शक्तिशाली बनाउन सहयोग गर्ने विश्वास गरिएको छ।
