काठमाडौं। अमेरिकी राष्ट्रपति डोनाल्ड ट्रम्पको भन्सार नीतिपछि प्रविधि कम्पनी एप्पलले अमेरिकामा बेचिने आईफोन र उपकरणहरूको उत्पादन चीनबाट भारत र भियतनाममा सार्ने तयारी गरेको छ।
एप्पलका सीईओ टिम कुकका अनुसार, अबदेखि अमेरिकामा बिक्री हुने अधिकांश आईफोन भारतमा निर्माण हुनेछ भने आईप्याड, एप्पल वाच, म्याकबुक र एयरपडको उत्पादन भियतनाममा हुनेछ।
अमेरिकी आयात करले कम्पनीको लागत ९०० मिलियन डलरले बढ्ने अनुमान गरिएपछि एप्पलले आपूर्ति श्रृंखलामा परिवर्तन गर्न थालेको हो। यद्यपि ट्रम्प प्रशासनले प्रमुख इलेक्ट्रोनिक वस्तुहरूलाई ट्यारिफबाट छुट दिने निर्णय गरेको छ। कम्पनीले अमेरिकामा आगामी ४ वर्षमा ५०० अर्ब डलरको लगानी गर्ने योजना पनि सार्वजनिक गरेको छ।
टिम कुकका अनुसार, चीनमा भने अमेरिका बाहेकका देशहरूको लागि उत्पादन यथावत् रहनेछ। भारतमा उत्पादन सार्न एप्पलले अर्बौं डलर खर्च गर्नुपर्नेछ। ट्यारिफ घोषणापछि एप्पलको सेयर घटे पनि कम्पनीको राजस्व ५% ले बढेर ९५.४ अर्ब डलर पुगेको छ। विश्लेषक प्याट्रिक मूरहेडले भने, “आईफोन उत्पादन भारतमा सार्नु चीन निर्भरता घटाउने सकारात्मक संकेत हो।”
