दुबई। विश्वकै ठूलो फिन्टेक तथा डिजिटल वाणिज्य प्रदर्शनी सिमलेस दुबई २०२५ मा पहिलोपटक नेपाल पविलियनको औपचारिक उद्घाटन भएको छ।
फिन्टेक एलायन्स नेपाल (एफएएन) को नेतृत्वमा स्थापना गरिएको पविलियनमा ९ वटा नेपाली आइटी तथा फिन्टेक कम्पनीहरूको सहभागिता रहेको छ। उद्घाटन समारोहमा यूएईका लागि नेपाली राजदूत तेजबहादुर क्षेत्री तथा विश्वभरका शीर्ष फिन्टेक अधिकारीहरूको उपस्थिति थियो।
दुबई वर्ल्ड ट्रेड सेन्टरको हल ८ मा रहेको ८८ वर्गमिटरको यस पविलियनले नेपालको फिन्टेक क्षेत्रलाई अन्तर्राष्ट्रिय मञ्चमा प्रभावशाली रूपमा प्रस्तुत गरेको छ।
एफएएनका अध्यक्ष साजन शर्माले यो पविलियन नेपाली नवप्रवर्तन र सम्भावनाको प्रतीक भएको बताएका छन्। नेपाल पविलियनमा सहभागी कम्पनीहरूमा सिटी एक्सप्रेस, सिटीटेक ग्लोबल, आइएमई लिमिटेड, एनएमबी बैंक, ल्याम्डा पेमेंट्स, माइक्रोब्यांकर नेपाल, प्रोग्रामिज, आइमार्क प्रालि र रारा ल्याब्स छन्।
एफएएनले यस सहभागितालाई ऐतिहासिक सुरुआतका रूपमा लिएको छ।
