काठमाडौं। कामना सेवा विकास बैंक लिमिटेडले आफ्नो ग्राहकहरूको सुविधा, समय र सुरक्षालाई ध्यानमा राख्दै अत्याधुनिक प्रविधिमा आधारित अन्तर बैंक टेलर क्यूआर सेवा सञ्चालनमा ल्याएको छ।
बैंकले शुक्रबार एक सूचनामार्फत जानकारी दिँदै यो सेवा ग्राहकहरूको बैंकिङ्ग अनुभवलाई थप सहज, सरल र द्रुत बनाउने उद्देश्यसहित सुरु गरिएको जनाएको छ। अब अन्य कुनै पनि बैंक वा वित्तीय संस्थाको मोबाइल बैंकिङ एप प्रयोग गरेर कामना सेवा विकास बैंकको नगद काउण्टरबाट रकम झिक्न सकिने छ।
यस प्रणाली अन्तर्गत कामना सेवाको स्मार्ट टेलर क्यूआर स्क्यान गरेर ग्राहकले आफूले प्रयोग गरिरहेको अन्य बैंकको खाताबाट सिधै नगद झिक्न सक्नेछन्। यसको मतलब, अब कुनै पनि बैंकको खातामा पैसा भए पनि नगद झिक्नकै लागि अनिवार्य रूपमा सोही बैंकको शाखामा जानुपर्ने बाध्यता हटेको छ।
बैंकका अनुसार, यस सेवाले अन्तर बैंक कारोबारमा नवीनतम प्रविधिको प्रयोगमार्फत ग्राहकको बैंकिङ्ग अनुभवलाई थप सहज बनाउनेछ। साथसाथै, यो सेवा विशेष गरी ती ग्राहकहरूका लागि उपयोगी हुनेछ, जसले मोबाइल बैंकिङ चलाउने गर्दछन् तर आफ्नै बैंक शाखा नजिक नभएको अवस्थालाई सामना गर्नुपर्छ।
कामना सेवा विकास बैंकले विगतदेखि नै डिजिटल बैंकिङ प्रविधिमा ध्यान दिँदै आएको छ। यसअघि पनि बैंकले विभिन्न डिजिटल सेवा तथा उत्पादनमार्फत ग्राहकलाई घरमै बसेर बैंकिङ्ग सेवा लिने सुविधा दिँदै आएको थियो।
