काठमाडौँ। प्रयोगकर्ताको अनुभवलाई अझ प्रभावकारी बनाउन व्हाट्सएपले नयाँ–नयाँ सुविधा थप्ने काम जारी राखेको छ। हाल कम्पनीले एन्ड्रोइड प्रयोगकर्ताका लागि विशेष ‘मोशन फोटो’ नामको सुविधा परीक्षण गरिरहेको छ।
फिचर ट्रयाकर WABetaInfo का अनुसार, यो सुविधा हालैको व्हाट्सएप बीटा भर्जन 2.25.22.29 मा देखिएको हो र हाल केही सीमित बीटा प्रयोगकर्तामात्र यसको प्रयोग गर्न पाएका छन्।
के हो मोशन फोटो?
मोशन फोटो एउटा यस्तो क्यामेरा सुविधा हो जसमा फोटो खिचिनु अघि र पछि केही सेकेन्डको भिडियो पनि कैद हुन्छ। यसमा केवल तस्वीरको हलचल मात्र होइन, सो समयको आवाज पनि रेकर्ड हुन्छ, जसले तस्वीरलाई थप ‘लाइभ’ अनुभव दिन्छ। यो सुविधा पहिले नै स्यामसङको Motion Photos र गुगल पिक्सलको Top Shot जस्ता स्मार्टफोनमा उपलब्ध छ।
व्हाट्सएपमा कसरी काम गर्ने?
जब प्रयोगकर्ताले ग्यालरीबाट कुनै तस्वीर छान्नेछन्, स्क्रिनको माथिल्लो दायाँ कुनामा नयाँ आइकन देखिनेछ। यसमा ‘प्ले’ बटन वरिपरि रिङ र सानो घेरा हुनेछ। यसमा ट्याप गरेर प्रयोगकर्ताले तस्वीरलाई मोशन फोटोको रूपमा पठाउन सक्नेछन्। पठाइएका मोशन फोटोमा हलचल मात्र होइन, त्यस क्षणको आवाज पनि सुन्न सकिनेछ।
के–के चाहिन्छ?
मोशन फोटो पठाउनका लागि तपाईंको स्मार्टफोनमा यो सुविधा पहिल्यै समर्थित हुनुपर्छ। यदि फोनमा मोशन फोटो खिच्ने क्षमता छैन भने पनि, अरूले पठाएको मोशन फोटो हेर्न सकिनेछ।
अर्को सुविधा पनि तयारीमा
मोशन फोटो बाहेक, व्हाट्सएपले अर्को महत्त्वपूर्ण सुविधा ‘यूजरनेम’ साझेदारी गर्नेमा पनि काम गरिरहेको छ। यसअन्तर्गत प्रयोगकर्ताले आफ्नो फोन नम्बरको सट्टा यूजरनेम मार्फत सम्पर्क गर्न सक्नेछन्, जसले गोपनीयता र सुरक्षालाई अझ मजबुत बनाउने कम्पनीको दाबी छ।
पोषणविद्हरूको भनाइमा, यी दुवै सुविधाले प्रयोगकर्ताको अनुभवलाई नयाँ स्तरमा पुर्याउनेछन् — मोशन फोटोले सम्झनालाई जीवन्त बनाउन मद्दत गर्नेछ भने यूजरनेमले गोपनीयता र सुरक्षित सम्पर्कलाई सुदृढ बनाउनेछ।
