काठमाडौं। विश्वभर चर्चित अमेरिकी रियालिटी शोको नेपाली संस्करण शार्क ट्याङ्क नेपाल अब हिमालय टेलिभिजनमार्फत २०२५ जुलाई २ बाट प्रसारणमा आउँदैछ ।
निकै प्रतीक्षित यो व्यावसायिक रियालिटी शोले नेपाली उद्यमीलाई देशका सफल व्यावसायिक हस्तीसमक्ष आफ्ना आइडिया प्रस्तुत गर्ने प्लेटफर्म प्रदान गर्नेछ । जहाँ उनीहरूले मार्गदर्शन, मेन्टरशिप र जीवन परिवर्तन गर्ने लगानी पाउन सक्नेछन् ।
शार्क ट्याङ्क नेपालको प्रमुख प्रस्तुतिकर्ता ब्राण्डको रूपमा टीभीएस अपाचे आरटीआर १६० एसई रहनेछ । जुन उत्कृष्ट प्रदर्शन, नवीनता र अग्रताको प्रतीक हो । यो सहकार्यले नेपाली युवा उद्यमी र नयाँ व्यवसायलाई सम्भावनाको ढोका खोल्ने विश्वास गरिएको छ ।
जसरी अपाचे आरटीआर १६० एसईले सडकमा आत्मविश्वास र शुद्धता देखाउँछ । त्यसरी नै शार्क ट्याङ्क नेपालले उदाउँदा उद्यमीलाई अघि बढ्न मार्गदर्शन र अवसर दिनेछ । यी दुईको साझेदारीले नेपालको भविष्यका व्यावसायिक नेताका लागि मार्ग प्रशस्त गर्ने विश्वास गरिएको छ ।
शोको पहिलो सिजनमा नेपालका पाँच जना ख्यातिप्राप्त उद्यमी तथा उद्योगपति निर्णायकको रूपमा सहभागी हुनेछन् । आईएमई समूहका सह–संस्थापक तथा प्रबन्ध निर्देशक, हेमराज ढकाल, अग्नि समूहका प्रबन्ध निर्देशक, क्याबिनेट श्रेष्ठ, ज्योति समूहका निर्देशक, सौरभ ज्योति, भोईथ समूहकी प्रबन्ध निर्देशक, ऋतु सिंह वैद्य, र नाइम्बस समूहका प्रबन्ध निर्देशक, आनन्द बगरिया यी पाँच व्यावसायिक व्यक्तित्वको अनुभव र दृष्टिकोणले देशभर नयाँ उद्यमशीलता चेतना जगाउने अपेक्षा गरिएको छ ।
