तपाईँ अहिले कलेज पढ्दै हुनुहुन्छ तर दिमागमा केही स्टार्टअपको आइडिया फुरिरहेको छ? यदि त्यस्तो हो भने यो तपाईँको लागी सही मौका हो। आइडिया स्टुडियोद्वारा सञ्चालित कलेज आइडिया हन्टमा कलेजमा अध्ययनरत विद्यार्थीहरू जसको आइडियाले समाज र वातावरणमा सबैभन्दा बढी प्रभाव पार्छ, त्यसलाई प्राथमिकता दिने भनेको छ।
यसको मुख्य उद्देश्य रचनात्मक युवा दिमागलाई नवीन र दिगो “ग्रीनोभेशन” समाधानहरूको माध्यमबाट विद्यमान समस्याहरू समाधान गर्न बाहिर ल्याउनु हो। यसमा आवेदन दिनका लागि कुनै शुल्क लाग्दैन। त्यसैमाथि विद्यार्थीहरूले आफ्नो स्टार्टअप सबैको अगाडि राखेर त्यसबारे मार्गदर्शन पाउनुको साथै अनुभवी टिमबाट इन्क्युबेशन, मेन्टरशिप र नेटवर्किङ सिक्ने मौका पाउँछन्।
कलेज आइडिया हन्टको फाइनल इभेन्ट ‘आइ ह्याभ एन आइडिया’ मा नेपालका ख्यातिप्राप्त व्यक्तित्वहरू लगायत व्यापक श्रोतामाझ विद्यार्थीहरूले विचार प्रस्तुत गर्ने अवसर प्राप्त गर्दछन्। त्यसमध्येका उत्कृष्ट ३ विजेताले रु १,००,००० नगद पुरस्कार प्राप्त गर्नुका साथै त्यसपछिको यात्रामा पनि निरन्तर मेन्टरसिप सपोर्ट प्राप्त गर्नेछन् ।
त्यसका साथै विजेताहरूले राष्ट्रिय स्तरको इन्क्युबेसन कार्यक्रम र आइडिया स्टुडियोको आफ्नै बिजनेस रियालिटी टेलिभिजन शो मा प्रत्यक्ष प्रवेश पनि प्राप्त गर्नेछन्। यस्ता धेरै फाइदाहरू यसबाट पाउने हुँदा तपाईँ यदि स्टार्टअपमा कुनै आइडिया सोच्दै हुनुहुन्छ भने यसमा आवेदन दिँदा धेरै सिक्ने मौका पाउनु हुनेछ।
यसमा आवेदन फर्म भर्दा चाहिने आवश्यकताहरू :
१. तपाईँ हाल नेपालमा स्नातक वा स्नातकोत्तर अध्ययन गरिरहेको हुनु पर्ने हुन्छ। विद्यार्थीले नेपाल सरकारबाट मान्यता प्राप्त विश्वविद्यालयसँग सम्बन्धन प्राप्त गरेको हुनुपर्नेछ।
२. तपाइले आफ्नो नवीन आइडिया प्रस्तुत गर्नु पर्ने हुन्छ। ग्रीनोवेशन / सामाजिक नवीनता / प्रभाव विचारसँग सम्बन्धित विचारलाई विशेष प्राथमिकता दिनेछ।
३. यो आवेदन भर्ने अन्तिम मिति २०७९ भाद्र १९ गते सम्म मात्र हुनेछ। त्यसभन्दा पछि पठाइएका आवेदनलाई हेरिने छैन।
४. आवेदन सँगै आवेदकले एउटा २ मिनेट भिडियो बनाएर पठाउनु पर्ने हुन्छ। यसमा चाहिँ तपाइले आफ्नो व्यापार विचारलाई मजाले बुझाउनुको साथै यस विचारले कस्तो समस्यालाई समाधान गर्छ भन्नु पर्ने हुन्छ। तपाइको व्यापार विचारको मुख्य ग्राहक को हुनेछन् अनि तपाइले पाउने रकमबाट आफ्नो विचारमा कस्तो प्रभाव पार्न सक्नुहुन्छ भनी भन्नु पर्ने हुन्छ।
यसबाट चुनिएका १० टिमले रचनात्मकता, आलोचनात्मक सोच, आत्मज्ञान, सञ्चार, प्रस्तुति, सहकार्य र टिम वर्क सिक्ने मौका पाउँछन्। यहाँबाट सिकिएका ज्ञानलाई लिएर १० टिमले नै “आइ ह्याभ एन आइडिया” मा आफ्नो विचार प्रस्तुत गर्नु पर्ने हुन्छ। त्यसपश्चात् ३ टिमले रु. १,००,००० नगद आफ्नो विचारलाई रूप दिन पाउने छन्।
त्यसका साथै ३ विजेता टिमले आइडिया स्टुडियोको आफ्नो टिभी कार्यक्रम “सोचदेखि उद्योगसम्म ” मा सिधा प्रवेश पाउँछन्।
यसमा आवेदन भर्नको लागि आइडिया स्टुडियोको पेजमा गएर आवश्यक जानकारी भर्नु पर्ने हुन्छ।
