८ भदाै, काठमाडाैँ । कुनै पनि कम्प्युटर वा ल्यापटपमा आजकल छुट्टै ग्राफिक्स कार्ड भेटिन्छ। नयाँ कम्प्युटर खरिद गर्दा त्यसमा ग्राफिक्स कार्ड छुटै भएको किन्ने कि त्यही भित्रै रहेको किन्ने भन्ने एउटा अलमल त हुन्छ नै।

ग्राफिक्स कार्डको काम कस्तो हो? एकीकृत ग्राफिक्स कार्ड र समर्पित ग्राफिक्स कार्डमा कस्तो भिन्नता हुन्छ? के नयाँ ल्यापटपमा समर्पित ग्राफिक्स कार्ड नै राख्नु आवश्यक छ त?

जसरी तपाइले आफ्नो कपिमा रङ्ग देखाउन कलर पेन्सिलको प्रयोग गर्नु हुन्छ, त्यसरी नै यदि तपाइको कम्प्युटरले रङलाई बुझ्ने प्रयास गर्दै छ भने त्यसलाई ग्राफिक्स कार्डको आवश्यकता पर्दछ।

ग्राफिक्स प्रोसेसिङ युनिट या ग्राफिक्स कार्डको कार्य ग्राफिक्स अर्थात् इमेज, भिडियो, एनिमेसन आदि कम्प्युटरको स्क्रिनमा रेन्डर गर्नु हो।

एकीकृत ग्राफिक्स कार्ड (Integrated Graphics Card)

एकीकृत ग्राफिक्स कार्ड भन्नु र ग्राफिक्स प्रोसेसिङ युनिट (GPU) भन्नु उस्तै नै हुन्छ। यो कम्प्युटरको सिपियुमा हुन्छ। यसको कुनै अन्य भाग पनि हुँदैन। यसले गर्दा यसलाई आवश्यक पर्ने स्पेस र्‍यामबाट प्रयोग गर्दछ।

साथै त्यसलाई चल्न आवश्यक पर्ने पावर पनि सिपियुबाट तान्ने हुँदा यसले ब्याट्री सक्काउँछ। यसको आफ्नो छुट्टै कुलिंग सिस्टम नहुने हुँदा बढी लोडको काम दियो भने कम्प्युटर तात्ने समस्या देखिन्छ।

समर्पित ग्राफिक्स कार्ड (Dedicated Graphics Card)

गेमिंग र इडिटिङको चर्चा बढे पछि अहिले समर्पित ग्राफिक्स कार्डको पनि उत्तिकै माग र चर्चा बढेको छ। ग्राफिक्स कार्ड एउटा प्रोग्रामेबल लजिक चिप हो। यो ग्राफिक्स प्रोसेसिंग युनिट (GPU) भन्दा फरक हुन्छ। समर्पित ग्राफिक्स कार्डभित्र रहेका पाट पुर्जामध्ये ग्राफिक्स प्रोसेसिंग युनिट (GPU) पर्दछ।

एक सामान्य ग्राफिक्स कार्डमा आउटपुट इन्टर फेस, भीआरएएम (VRAM), RAMDAC, जिपियु (GPU) र अन्य धेरै भागहरू हुन्छन्। यसको कारणले यसले बढी फाइदा दिन्छ।

उदाहरणको रूपमा यदि तपाईँ गेमिङको लागि समर्पित ग्राफिक्स कार्ड लिँदै हुनुहुन्छ भने यसले तपाइको नयाँ प्रकारको गेमहरू खेल्दा अझै राम्रो अनुभव दिन्छ। त्यसै गरी, यसले गेमको भिजुअल पनि राम्ररी धान्न सक्छ।

यस भित्र नै आफ्नै स्टोरेजको सिस्टम हुने हुँदा कम्प्युटरको स्पेस पनि खाँदैन। त्यसै गरी, यसले आवश्यक पावर आफ्नै भागहरू बाट मिलाएर गर्ने हुँदा ब्याट्रीको लागि पनि राम्रो हुने भयो। यसको आफ्नै कुलिंग सिस्टम पनि हुन्छ।