१८ भदाै, सङ्खुवासभा । गत मङ्गलवार राती करिब २ बजे खाँदबारी नगरपालिका ३ मानेभञ्ज्याङका वीरेन्द्र भगत श्रेष्ठको पसल चोरी गर्ने चोर पत्ता लागेको छ । चोरी गर्ने क्रममा घर बेटीले थाहा पाएपछि भाग्ने क्रममा छाडिएको मोबाइलबाट प्रहरीले चोर पत्ता लगाएको छ ।
चोर्ने क्रममा श्रेष्ठ परिवार र छिमेकीहरूको हल्ला पछि भागेका तीन जना मध्ये एउटा मोबाइल सेट भेटिएको थियो । उक्त मोबाइल सेटको माध्यमबाट चोरीमा संलग्न तीनै जनालाई प्रहरीले पक्राउ गरी सार्वजनिक गरेको छ । चोरीमा संलग्न सिलिचोङ गाउँपालिका १ का ४२ वर्षीय नन्दराज राई, सोही गाउँका ३४ वर्षीय जगत् राई र सिलिचोङ ३ का वर्ष २३ का अङ्कित राईलाई प्रहरीले पक्राउ गरी बिहीबार सार्वजनिक गरेको हो ।
जिल्ला प्रहरी प्रमुख डिएसपी वीरेन्द्र गोदारका अनुसार उक्त मोबाइल धनी नन्दराज पत्ता लगाएर अनुसन्धान सुरु गरिएको थियो । अनुसन्धानकै क्रममा चोरीमा संलग्न अर्को सदस्यले म्यासेज गरेको थियो । उक्त म्यासेजलाई आधार बनाएर अनुसन्धान गर्दा दोस्रो व्यक्ति जगत् पनि पक्राउ गरिएको डिएसपी गोदारले जानकारी दिए । दुवै जना चोरीमा संलग्न भएको पुष्टि भएसँगै तेस्रो व्यक्ति अङ्कितलाई पनि पक्राउ गर्न सहज भएको गोदारले जानकारी दिए ।
उनीहरूको साथबाट ३ थान खुकुरी, फलामको रड, नकाब, फलाम काट्ने कैँची, मोबाइल सेट ४ थान, कपडा सहितको झोला, प्याकेटमा खोर्सानीको धुलो लगायतका सामाग्रीहरू बरामद गरिएको छ । चोरीमा संलग्नहरूलाई जिल्ला अदालत चैनपुरबाट ‘डाका चोरी तथा ज्यान मार्ने उद्योग’मा म्याद थप गरी थप अनुसन्धान भइरहेको प्रहरीले जनाएको छ ।
