२० भदाै, एजेन्सी। फाइन्डरको नयाँ अनुसन्धान अनुसार लाखौं अष्ट्रेलियनहरूले बैंक कार्ड मार्फत हुने ठगीमा करीब १ अर्ब डलर गुमाएको पाइएको छ।
उक्त अनुसन्धानका अनुसार प्रति ७ जनामध्ये एक जनाले बैंकको कार्डमार्फत हुने ठगीको सामना गरेका छन्। यो भनेको करीब १७ प्रतिशत भएको बताइएको छ।
औसतमा पीडितहरूले गत १२ महिनामा १९९.४० डलर ठगीमा परेर गुमाएका छन्। समग्रमा यो पैसा जोड्दा १ अर्ब डलरभन्दा बढी हुने फाइन्डरको अनुसन्धानले देखाएको छ।
१०५८ जनामा गरिएको अनुसन्धानले ठगीमा परेका मध्ये ११ प्रतिशतले रिपोर्ट गर्ने गरेको र ३ प्रतिशतले भने रिपोर्ट समेत नगरेको पत्ता लगाएको छ।
थप ३ प्रतिशत अष्ट्रेलियनहरू गत १२ महिनामा बैंक कार्डमार्फत ठगीको शिकार भएका थिए तर पछिसम्म ठगीमा परेको भनेर उनीहरूलाइ थाहा नै नभएको समेत पाइएको छ।
कार्डमार्फत हुने ठगीमा सबैभन्दा धेरै न्यु साउथ वेल्सका मानिसहरूले गुमाएको पाइएको छ। उनीहरूले औसतमा प्रतिव्यक्ति ४२९ डलर कार्डमार्फत हुने ठगीमा गुमाएको पाइएको छ। त्यस्तै, साउथ अष्ट्रेलियाका व्यक्तिहरूले भने १४९.५० डलर औसतमा गुमाउने गरेको पाइएको छ।
फाइन्डरका क्रेडिट कार्ड विशेषज्ञ एमी ब्राडनी-जर्जले यो घाटा ठूलो भएको बताएका छन्।
‘यो एकव्यापक समस्या हो। यसले निर्दोष अष्ट्रेलियनहरूलाई धोका दिने स्क्यामरहरू कत्तिको प्रभावकारी भएका छन् भनेर देखाउँछ।’ ब्राडनी-जर्जले भनेका छन्।
ठगीबाट बच्न खरिद, पुरस्कार र डेलिभरीहरूबारे नक्कली टेक्स्ट म्यासेेज र इमेलहरूबाट सावधान रहन ब्राडनी-जर्जले अनुरोध गरेका छन्।
ब्राडनी-जर्जले अधिकृत व्यवसायसँग व्यवहार गर्दै छु भन्ने पुष्टि नगरी कुनै पनि लिङ्कमा क्लिक गर्न वा व्यक्तिगत जानकारी नदिन पनि अनुरोध गरेका छन्।
