३ असोज, काठमाडाैँ। नेपाल एष्ट्रोनोमिकल सोसाइटी (नासो) ले विद्यालय तहका विद्यार्थीको प्रतिभा विकास गर्ने तथा अन्तरिक्षका बारेमा उत्सुकता बढाउने उद्देश्यले अन्तरिक्ष चित्रकला तथा अनलाइन वक्तृत्वकला प्रतियोगिता आयोजना गर्ने भएको छ ।
प्रतियोगितामा भाग लिन चाहनेले यही असोज १४ गतेसम्म वेबसाइटमार्फत आवेदन दिन सकिने नासोका अध्यक्ष सुरेश भट्टराईले राससलाई जानकारी दिए । राष्ट्रिय विज्ञान दिवस (असोज १), विश्व अन्तरिक्ष सप्ताह (अक्टोबर ४–१०) तथा विश्व विज्ञान दिवस (नोभेम्बर १०) को अवसर पारेर प्रतियोगिता सञ्चालन गर्न लागिएको हो । राष्ट्रिय अन्तरिक्ष चित्रकला तथा अनलाइन वक्तृत्वकला प्रतियोगिताको लागि विद्यालय तहको कक्षा ६ देखि १२ सम्म अध्ययनरत इच्छुक विद्यार्थीले यही असोज १४ गतेसम्म नासोको वेबसाइटमार्फत आवेदन दर्ता गर्नसक्ने जनाइएको छ ।
दुवै प्रतियोगिताका लागि यो वर्षको शीर्षक ‘अन्तरिक्ष र दिगोपना तय गरिएको छ । इच्छुक विद्यार्थीले यसै शीर्षकमा केन्द्रित रहेर आफ्नो रचना अनलाइन फारममार्फत नासोको कार्यालयमा पठाउन सक्नेछन् । वक्तृत्वकलामा विद्यार्थीको रचनात्मक प्रस्तुतिलाई स्थान दिन भिडियो सम्पादन गर्न छुट दिइएको छ । त्यस्तै चित्रकलाका सम्बन्धमा पनि विद्यार्थीले आफ्नो रचनालाई बढीमा एक मिनेटमा व्याख्या गरेको भिडियो बनाएर पठाउनुपर्नेछ ।
यसरी प्राप्त रचनामध्ये उत्कृष्ट रचना नेपाल एष्ट्रोनोमिकल सोसाइटीको आधिकारिक युट्युब च्यानलमा जनमतको लागि राखिनेछ । पुरस्कारसम्बन्धी निर्णय गर्दा ५० प्रतिशत जनमत तथा ५० प्रतिशत निर्णायक मण्डलको मूल्याङ्कनलाई आधार बनाइनेछ ।
प्रतियोगितामा आवेदन गरिएका रचना प्रतियोगिता अवधिभर अन्य कुनै स्थानमा सार्वजनिक गर्न नपाइने उहाँले बताउनुभयो । यसो गरेको पाइएमा उक्त रचना प्रतियोगिताबाट हटाइनेछ । दुवै प्रतियोगितामा सहभागी विद्यार्थीलाई प्रोत्साहनस्वरुप सहभागिताको प्रमाणपत्र प्रदान गरिन जनाइएको छ ।
छैटौँ राष्ट्रिय अन्तरिक्ष चित्रकला प्रतियोगिताको लागि कक्षा ६ देखि ८ सम्म अध्ययनरत विद्यार्थीले आवेदन दिन सक्नेछन् । प्रतियोगितामा प्रथम हुनेले टेलिस्कोप, पदक तथा प्रमाणपत्र प्राप्त गर्नेछन् भने दोस्रो र तेस्रो हुनेले क्रमशः गिफ्ट ह्याम्पर, पदक तथा प्रमाणपत्र प्राप्त गर्नेछन् ।
चौथो राष्ट्रिय अनलाइन अन्तरिक्ष वक्तृृत्वकला प्रतियोगितामा कक्षा ९ देखि १२ सम्म अध्ययनरत विद्यार्थीले आवेदन दिन सक्नेछन् । प्रतियोगितामा प्रथम, दोस्रो तथा तेस्रो हुने विद्यार्थीलाई पुरस्कार स्वरुप क्रमशः नगद रु १० हजार, रु पाँच हजार तथा रु तीन हजार साथै पदक र प्रमाणपत्र प्रदान गरिनेछ । प्रतियोगितासम्बन्धी नियम तथा दर्ता प्रक्रियाबारे सम्पूर्ण जानकारीका लागि वेबसाइट हेर्न पनि नासोले आग्रह गरेको छ ।
