११ कार्तिक, एजेन्सी। टिकटक च्यालेन्ज गर्दा चार किशोरकिशोरीको मृत्यु भएको छ। गत सोमबार न्युयोर्कमा भएको कार दुर्घटनामा परि उनीहरूको मृत्यु भएको हो।
कार कम्पनी कियाले बिहीबार एक विज्ञप्ती जारी गर्दै टिकटक च्यालेन्ज गर्ने क्रममा उनीहरूको मृत्यु भएको जानकारी दिएको हो।
दुर्घटनाग्रस्त कारमा ६ जना सवार थिए। उनीहरूमध्ये तीन जनाको घटनास्थलमै र एक जनाको अस्पतालमा उपचारका क्रममा मृत्यु भएको हो। मृत्यु हुनेमा १४ देखि १७ वर्ष उमेरका रहेको पुष्टि भएको छ।
१६ वर्षीय चालकलाई प्रहरीले हिरासतमा लिएको छ र दुर्घटनामा संलग्न भएको आरोपमा शुक्रबार पुर्पक्षको लागि तयारी भइरहेको छ।
प्रहरीको प्रारम्भिक अनुसन्धानबाट उक्त कार आइतबार राति ८ बजेतिर चोरी भएको थियो। उनीहरूले कारमा चाबीको सट्टा कसरी युएसबी केबलले कार स्टार्ट गरेर चोर्ने भन्ने टिकटक च्यालेन्ज गरेको पाइएको छ।
यो च्यालेन्जले अमेरिकामा पछिल्लो समय किया कम्पनीका कारहरू चोरी हुने संख्या बढीरहेको रिपोर्ट समेत देखिएको छ।
