७ पुस, जुम्ला। जिल्लाका स्थानीय तहका प्रविधिकलाई गृह मन्त्रालयको आयोजनामा ‘कोबोकलेक्ट मोबाइल एप्स’ विषयक अभिमुखीकरण तालिम दिइएको छ । उक्त मन्त्रालय अन्तर्गतको राष्ट्रिय विपत् जोखिम न्यूनीकरण तथा व्यवस्थापन शाखाले विपत्मा घर भत्किएमा घटनास्थलबाटै ‘अपलोड’ गर्न सकिने गरी सो एप्सबारे तालिम दिएको हो ।
मन्त्रालयका उपसचिव धु्रवबहादुर खड्का, सूचना प्रविधि अधिकृत यूवराज भण्डारीसहितको टोलीले स्थानीय तहका प्राविधिक, जनप्रतिनिधि, विपत् शाखा र विपत् व्यवस्थापन समितिका पदाधिकारीलाई विद्युतीय प्रणालीको एप्स ‘डाउनलोड’देखि तस्बीर र फोटो कसरी ‘अपलोड’ गर्ने विषयमा जानकारी गराएको थियो ।
अधिकृत भण्डारीले योभन्दा पहिला ६७ वटा जिल्लामा भर्चुअलरुपमा तालिम दिइएकामा अव भौतिक रुपमै जिल्ला जिल्लामा जानकारी गराइएको बताए ।
प्रमुख जिल्ला अधिकारी मुकेशकुमार केशरीले यसबाट स्थानीय तहका विपद् शाखादेखि प्रविधिक सम्मलाई निकै राहत पुगेको बताए । यसवर्षको विपतमा जुम्लामा दुई हजारभन्दा बढी घर क्षति, दश जनाको मृत्यु र आठवटै स्थानीय तहमा करोडाैँका खेतीयोग्य जमिन क्षति भएको थियो ।
