२८ पुस, भोजपुर। भोजपुरका मालपोत तथा नापी कार्यालयमा शुरू भएको डिजिटल प्रविधिले सेवा प्रवाहमा सहज बनाएको छ ।
सरकारले लागू गरेको भूमि सम्बन्धी डिजिटल प्रविधि सेवा प्रभावकारी बनेसँगै यहाँबाट प्रवाह हुने सेवामा चुस्तता आएको हो ।
यो प्रविधिबाट काम छिटोछरितो र पारदर्शी हुँदा नागरिकमा सेवाप्रति विश्वास बढेको छ । यहाँको भूमि सम्बन्धी सम्पूर्ण विवरण अनलाइनमा रहने भएकाले आवश्यक परेको बेलामा सहजरूपमा विवरण पाउन सकिने स्थानीयको भनाइ थियो । प्रविधिको प्रयोगले नागरिकले पनि सहज रूपमा सेवा पाउन थालेका छन् ।
जग्गा सम्बन्धी विवरणको जानकारी लिन विगतका पुराना फाइल खोज्दा समय लाग्ने भए पनि अहिलेको प्रविधिले सहज रूपमा पाउने सकिने अवस्था बनेको सेवा लिन मालपोत कार्यालय आएका स्थानीय बमबहादुर राईले बताए ।
‘सरकारले लागू गरेको डिजिटल प्रविधिबाट काम गर्न सहज छ,’ उनले भने, ‘विगतमा जग्गा सम्बन्धी कारोबार गर्न निकै झन्झट थियो । यो प्रविधिको प्रयोगले जग्गामा हुने विभिन्न खाले विकृति रोक्न टेवा पुग्ने रहेछ ।’
डिजिटल प्रविधिले जग्गाको विवरण, नक्सा प्रिन्ट, नक्सांकन लगायत सबै काम गुणस्तरीय हुनाका साथै नागरिकलाई चाँडो सेवा प्रदान गर्न सकिने नापी कार्यालयले जनाएको छ ।
यो प्रविधिको प्रयोगले क्षेत्रफलमा एकरूपता हुने र प्रतिकूल समयमा पनि छिट्टै नक्सा तयार गरी प्रिन्ट गर्न सकिने जिल्ला नापी कार्यालयका प्रमुख देवकुमार बस्नेतले बताए ।
‘भूमि सम्बन्धी कामलाई डिजिटल बनाइएसँगै काम गर्न सहज भएको छ,’ उनले भने, ‘यसले गर्दा कर्मचारीको कार्यबोझ कम गराउनाका साथै सेवाग्राही नागरिकलाई सहजरूपमा सेवा दिन सकिने र पुरानो विवरण खोज्न पनि सहज भएको छ ।’
यो प्रविधिबाट कुनै पनि व्यक्तिको नाममा नेपालभर रहेको जग्गालाई सहजरूपमा पत्ता लगाउन सकिने जनाइएको छ । जग्गाधनीको विवरण अनलाइनमा राखिने भएकाले जहाँबाट पनि उनीहरूको वितरण हेर्न सकिने मालपोत कार्यालयले जनाएको छ ।
