टेलिकमको प्रि-पेड र पोस्टपेड दुवै नेटवर्कमा मङ्गलवार दिउँसो १२ बजेदेखि नै देखिएको समस्या अझै पनि समाधान हुन सकेको छैन। नेपाल टेलिकमको नेटवर्क बाट फोन, एस.एम.एस गर्न नमिल्ने तथा डाटा समेत लिन नमिल्ने र भएकोमा पनि नचल्ने समस्या आएपछि उपभोक्ता आक्रोशित बनेका थिए।
बारम्बारको सम्पर्क प्रयास पछि टेक कागजका सम्वाददाता सँग कुरा गर्दै टेलिकमका सूचना अधिकारी सोभान अधिकारीले एकै समयमा निर्धारित कल सङ्ख्या भन्दा बढी कलहरू भएकाले उक्त समस्या देखा परेको बताएका थिए।
उक्त सूचना अधिकारीले समस्या समाधान भइसकेको बताए पनि समस्या पूर्ण रूपमा समाधान भई नसकेको पाइएको छ। अझै पनि केही समय काम गर्ने र बढी जसो समय सोही समस्या रहिरहेको उपभोक्ताहरूले बताएका छन्।
फोन कल गर्न नमिल्ने, डाटा नचल्ने, ब्यालेन्स चेक गर्न नमिल्ने जस्ता समस्या जिउँ का तिउँ रहेको टेक कागजका प्रविधि अधिकारीको समेत ठम्याई छ।
घन्टौँ सम्म पनि राष्ट्रका उच्च स्तरमा रहेका यस्ता संस्थानहरूले यति सानो समस्या समेत समयमा समाधान गर्न नसक्नु कर्मचारीतन्त्रको मात्रै नभई राज्यकै लज्जाको विषय हो, यस्ता विषयहरूमा राज्य संवेदनशील कहिले बन्ने? यस्ता साना तिना लापरबाहीका कारण उपभोक्तामा परेको समस्या र यसले पारेको घाटाको परिपूर्ति कसले गरिदिने?
के आज मात्रै बिस्तार भएको मन्त्रीमण्डलकी सूचना तथा सञ्चार मन्त्री रेखा शर्माको यता ध्यान जाला ? यो भने चासोको विषय बनेको छ।
